ghabra ke sham-e-hijr ki tanhaiyon se hum

ghabrā ke shām-e-hijr kī tanhā.iyoñ se ham

bahle na dil kī anjuman-ārā.iyoñ se ham

phir dil ko ‘arz-e-shauq ke qābil banā diyā

phir muztarib haiñ un kī masīhā.iyoñ se ham

kuchh dil kā ehtimām hai kuchh hai nazar kā faiz

vāqif haiñ ḳhuub husn kī rā'nā.iyoñ se ham

ab kyā kareñ ki zabt kī had se guzar ga.e

ḳhud munfa’il haiñ shauq kī pinhā.iyoñ se ham

sajde kar ai nigāh ki mahrūm ho ga.e

is āstāñ pe nāsiya-farsā.iyoñ se ham

rā'nā.ī-e-nigāh to dekho ki husn ko

begāna kar rahe haiñ ḳhud-ārā.iyoñ se ham

karnī paḌeñgī 'ishq kī nādāniyāñ qubūl

tang aa ga.e haiñ 'aql kī dānā.iyoñ se ham

jalva-gah-e-majāz-o-haqīqat kī aaḌ meñ

khelā kiye haiñ apnī hī parchhā.iyoñ se ham

jin meñ 'hazīñ' nazākat-e-ehsās hī na ho

baaz aa.e aisī qāfiya-paimā.iyoñ se ham

ghabra ke sham-e-hijr ki tanhaiyon se hum

bahle na dil ki anjuman-araiyon se hum

phir dil ko ‘arz-e-shauq ke qabil bana diya

phir muztarib hain un ki masihaiyon se hum

kuchh dil ka ehtimam hai kuchh hai nazar ka faiz

waqif hain KHub husn ki ra'naiyon se hum

ab kya karen ki zabt ki had se guzar gae

KHud munfa’il hain shauq ki pinhaiyon se hum

sajde kar ai nigah ki mahrum ho gae

is aastan pe nasiya-farsaiyon se hum

ra'nai-e-nigah to dekho ki husn ko

begana kar rahe hain KHud-araiyon se hum

karni paDengi 'ishq ki nadaniyan qubul

tang aa gae hain 'aql ki danaiyon se hum

jalwa-gah-e-majaz-o-haqiqat ki aaD mein

khela kiye hain apni hi parchhaiyon se hum

jin mein 'hazin' nazakat-e-ehsas hi na ho

baz aae aisi qafiya-paimaiyon se hum