ghabrae jitna maut ki dil-bastagi se hum

ghabrā.e jitnā maut kī dil-bastagī se ham

begāna utne hote ga.e zindagī se ham

kyūñki badal deñ ne.amat-e-ġham ko ḳhushī se ham

kis tarah maañg laa.eñ tabassum kisī se ham

kuchh aisī bāteñ siikh ga.e dostī se ham

karte nahīñ ab apnā ta.āruf kisī se ham

kah do shab-e-firāq ke tāroñ se Duub jaao

mānūs ab nahīñ haiñ kisī raushnī se ham

ḳhāmoshiyoñ ne qissa-e-ġham bhī bhulā diyā

ab baat bhī kareñ to kareñ kyā kisī se ham

ḳhud apne dil se ho ga.e begāna is tarah

jaise jhijak rahe hoñ kisī ajnabī se ham

āḳhir ko chalne vāloñ ne pahchān hī liyā

nikle jo sar jhukā.e tumhārī galī se ham

shāyad isī se ashk bhī āñkhoñ meñ aa ga.e

tārīkiyoñ ko dekh na leñ raushnī se ham

jis ne jalā diye haiñ tamannāoñ ke charāġh

aajiz se ho ga.e haiñ usī zindagī se ham

ab 'fazl' hasrateñ haiñ na fikr-o-nazar meñ zau

jaañ nazr kar rahe haiñ baḌī bekasī se ham

ghabrae jitna maut ki dil-bastagi se hum

begana utne hote gae zindagi se hum

kyunki badal den neamat-e-gham ko KHushi se hum

kis tarah mang laen tabassum kisi se hum

kuchh aisi baaten sikh gae dosti se hum

karte nahin ab apna taaruf kisi se hum

kah do shab-e-firaq ke taron se Dub jao

manus ab nahin hain kisi raushni se hum

KHamoshiyon ne qissa-e-gham bhi bhula diya

ab baat bhi karen to karen kya kisi se hum

KHud apne dil se ho gae begana is tarah

jaise jhijak rahe hon kisi ajnabi se hum

aaKHir ko chalne walon ne pahchan hi liya

nikle jo sar jhukae tumhaari gali se hum

shayad isi se ashk bhi aankhon mein aa gae

tarikiyon ko dekh na len raushni se hum

jis ne jala diye hain tamannaon ke charagh

aajiz se ho gae hain usi zindagi se hum

ab 'fazl' hasraten hain na fikr-o-nazar mein zau

jaan nazr kar rahe hain baDi bekasi se hum