ghaDi ghaDi hai hamein apne meherban ka KHayal

ghaḌī ghaḌī hai hameñ apne meherbāñ kā ḳhayāl

na kuchh zamīñ kī ḳhabar hai na āsmāñ kā ḳhayāl

ye be-ḳhudī hai ki jis din se dil lagā baiThe

kahāñ kā hosh kahāñ kī ḳhabar kahāñ kā ḳhayāl

uḌe hue haiñ raqīboñ ke hosh pe ab tak

jo dil meñ aap ke aaya thā imtihāñ kā ḳhayāl

adū se hañste rahe raat bhar sar-e-mahfil

kiyā na tum ne mire chasm-e-ḳhūñ-fashāñ kā ḳhayāl

kisī ko do na sar-e-bazm be-dhaḌak gaalī

ḳhudā ke vāste rakkho zarā zabāñ kā ḳhayāl

qadam jo bhuul ke rakkheñ rah-e-mohabbat meñ

to ḳhizr ko bhī na ho umr-e-jāvedāñ kā ḳhayāl

lagā na ḳhuld meñ bhī dil maiñ kyā bayāñ karūñ

vahāñ bhī mujh se na chhūTā tire makāñ kā ḳhayāl

maiñ us taraf kabhī ruḳh bhuul kar nahīñ kartā

maiñ kyā batā.ūñ jab aatā hai pāsbāñ kā ḳhayāl

ḳhudā ke vāste maano mirā kahā ai 'ranj'

ḳhudā ke vāste chhoḌo ye hai kahāñ kā ḳhayāl

ghaDi ghaDi hai hamein apne meherban ka KHayal

na kuchh zamin ki KHabar hai na aasman ka KHayal

ye be-KHudi hai ki jis din se dil laga baiThe

kahan ka hosh kahan ki KHabar kahan ka KHayal

uDe hue hain raqibon ke hosh pe ab tak

jo dil mein aap ke aaya tha imtihan ka KHayal

adu se hanste rahe raat bhar sar-e-mahfil

kiya na tum ne mere chasm-e-KHun-fashan ka KHayal

kisi ko do na sar-e-bazm be-dhaDak gali

KHuda ke waste rakkho zara zaban ka KHayal

qadam jo bhul ke rakkhen rah-e-mohabbat mein

to KHizr ko bhi na ho umr-e-jawedan ka KHayal

laga na KHuld mein bhi dil main kya bayan karun

wahan bhi mujh se na chhuTa tere makan ka KHayal

main us taraf kabhi ruKH bhul kar nahin karta

main kya bataun jab aata hai pasban ka KHayal

KHuda ke waste mano mera kaha ai 'ranj'

KHuda ke waste chhoDo ye hai kahan ka KHayal