ghaDi ki suiyan Tik-Tik suna rahi hain mujhe

ghaḌī kī sūiyāñ Tik-Tik sunā rahī haiñ mujhe

guzarte vaqt se shāyad Darā rahī haiñ mujhe

tire bayān ko lafzoñ kī kyā zarūrat hai

ki ye ḳhamoshiyāñ sab kuchh batā rahī haiñ mujhe

to kyā huā jo tirā pyaar mil nahīñ paayā

tirī ye nafrateñ bhī raas aa rahī haiñ mujhe

havā kī shoḳhiyāñ batlā rahī haiñ terā pata

hasīn titliyāñ rasta dikhā rahī haiñ mujhe

shab-e-firāq mire ham-navā tirī yādeñ

ġhamoñ kī taal pe har dam nachā rahī haiñ mujhe

koī to ho jo mujhe rok le sadā de kar

mirī ye hasrateñ har jā ghumā rahī haiñ mujhe

'zakī' ye raah ke patthar bhī mere rahbar haiñ

ki in kī Thokareñ chalnā sikhā rahī haiñ mujhe

ghaDi ki suiyan Tik-Tik suna rahi hain mujhe

guzarte waqt se shayad Dara rahi hain mujhe

tere bayan ko lafzon ki kya zarurat hai

ki ye KHamoshiyan sab kuchh bata rahi hain mujhe

to kya hua jo tera pyar mil nahin paya

teri ye nafraten bhi ras aa rahi hain mujhe

hawa ki shoKHiyan batla rahi hain tera pata

hasin titliyan rasta dikha rahi hain mujhe

shab-e-firaq mere ham-nawa teri yaaden

ghamon ki tal pe har dam nacha rahi hain mujhe

koi to ho jo mujhe rok le sada de kar

meri ye hasraten har ja ghuma rahi hain mujhe

'zaki' ye rah ke patthar bhi mere rahbar hain

ki in ki Thokaren chalna sikha rahi hain mujhe