bas ek nigah mein qissa tamam hota hai

bas ik nigāh meñ qissa tamām hotā hai

to kyā ye vāqa'ī itnā sā kaam hotā hai

kisī ke sard ravayye pe ḳhāmushī kā lihāf

ye intiqām bhī kyā intiqām hotā hai

kabhī kabhī koī luqma kahīñ kahīñ koī kaam

halāl hote hue bhī harām hotā hai

firāq-e-yār se kyā kyā umiid thī lekin

ye ranj bhī koī do-chār gaam hotā hai

asiir asiir hī hotā hai qaid koī bhī ho

kisī bhī shakl meñ ho daam daam hotā hai

shu'ūr jis meñ na ho us meñ shā'irī kyā ho

jo ḳhush-badan ho vahī ḳhush-ḳhirām hotā hai

vo shaḳhs yuuñ to kisī kaam kā nahīñ lekin

sunā hai us ke yahāñ intizām hotā hai

kabhī kabhī baḌī mushkil meñ Daal dete haiñ

vo jin kā dil meñ bahut ehtirām hotā hai

khaḌā huuñ kitne hī rishtoñ ko thaam kar 'javvād'

aur aise meñ jo mirā inhidām hotā hai

bas ek nigah mein qissa tamam hota hai

to kya ye waqa'i itna sa kaam hota hai

kisi ke sard rawayye pe KHamushi ka lihaf

ye intiqam bhi kya intiqam hota hai

kabhi kabhi koi luqma kahin kahin koi kaam

halal hote hue bhi haram hota hai

firaq-e-yar se kya kya umid thi lekin

ye ranj bhi koi do-chaar gam hota hai

asir asir hi hota hai qaid koi bhi ho

kisi bhi shakl mein ho dam dam hota hai

shu'ur jis mein na ho us mein sha'iri kya ho

jo KHush-badan ho wahi KHush-KHiram hota hai

wo shaKHs yun to kisi kaam ka nahin lekin

suna hai us ke yahan intizam hota hai

kabhi kabhi baDi mushkil mein Dal dete hain

wo jin ka dil mein bahut ehtiram hota hai

khaDa hun kitne hi rishton ko tham kar 'jawwad'

aur aise mein jo mera inhidam hota hai