ghane jangalon mein kiran rah gai

ghane jangaloñ meñ kiran rah ga.ī

hamāre badan meñ thakan rah ga.ī

ujāloñ ko tanhā.iyāñ pī ga.iiñ

añdheroñ meñ ġharq anjuman rah ga.ī

kahīñ rishta-e-jān-o-tan kho gayā

kahīñ saath tāb-e-badan rah ga.ī

lahū ro ke kahtā rahā maiñ ġhazal

pas-e-parda fikr-e-suḳhan rah ga.ī

maiñ gūñge safar kā musāfir rahā

har ik gaam par ik jalan rah ga.ī

jo bistar se uTThā sañbhalte hue

jabīn-e-sahar par shikan rah ga.ī

'zafar' jis se ḳhushbū kī lazzat milī

bikhar kar vo shāḳh-e-chaman rah ga.ī

ghane jangalon mein kiran rah gai

hamare badan mein thakan rah gai

ujalon ko tanhaiyan pi gain

andheron mein gharq anjuman rah gai

kahin rishta-e-jaan-o-tan kho gaya

kahin sath tab-e-badan rah gai

lahu ro ke kahta raha main ghazal

pas-e-parda fikr-e-suKHan rah gai

main gunge safar ka musafir raha

har ek gam par ek jalan rah gai

jo bistar se uTTha sanbhalte hue

jabin-e-sahar par shikan rah gai

'zafar' jis se KHushbu ki lazzat mili

bikhar kar wo shaKH-e-chaman rah gai