ghar apna wadi-e-barq-o-sharar mein rakkha jae

ghar apnā vādī-e-barq-o-sharar meñ rakkhā jaa.e

ta.alluqāt kā saudā na sar meñ rakkhā jaa.e

agar talab ho kabhī chand ghūñT paanī kī

samundaroñ kā tasavvur nazar meñ rakkhā jaa.e

sunā hai duḳhtar-e-tahzīb ghar se bhaag ga.ī

chhupā ke bachchoñ ko hargiz na ghar meñ rakkhā jaa.e

pata nahīñ ki kahāñ rah-zanoñ kī ho yalġhār

koī difā.a bhī raḳht-e-safar meñ rakkhā jaa.e

batāo kaise milegī hameñ sahīh ta.abīr

jab apnā ḳhvāb hī chashm-e-digar meñ rakkhā jaa.e

lo ab to ham bhī havāoñ ke saath chalne lage

hamārā naam bhī ahl-e-hunar meñ rakkhā jaa.e

kitāb ziist meñ bāb-e-alam bhī ho mahfūz

siyāh-rāt kā manzar sahar meñ rakkhā jaa.e

qafas ko le ke jo uḌā jaa.e gulistāñ kī taraf

vo azm tā.ir-e-be-bāl-o-par meñ rakkhā jaa.e

ghar apna wadi-e-barq-o-sharar mein rakkha jae

talluqat ka sauda na sar mein rakkha jae

agar talab ho kabhi chand ghunT pani ki

samundaron ka tasawwur nazar mein rakkha jae

suna hai duKHtar-e-tahzib ghar se bhag gai

chhupa ke bachchon ko hargiz na ghar mein rakkha jae

pata nahin ki kahan rah-zanon ki ho yalghaar

koi difaa bhi raKHt-e-safar mein rakkha jae

batao kaise milegi hamein sahih tabir

jab apna KHwab hi chashm-e-digar mein rakkha jae

lo ab to hum bhi hawaon ke sath chalne lage

hamara nam bhi ahl-e-hunar mein rakkha jae

kitab zist mein bab-e-alam bhi ho mahfuz

siyah-raat ka manzar sahar mein rakkha jae

qafas ko le ke jo uDa jae gulistan ki taraf

wo azm tair-e-be-baal-o-par mein rakkha jae