ghar-bar kahan kucha o bazar meri jaan

ghar-bār kahāñ kūcha o bāzār mirī jaañ

darvesh ko duniyā nahīñ darkār mirī jaañ

ik shahr zamīñ-bos hai aamad pe tumhārī

raste meñ bichhe haiñ dar-o-dīvār mirī jaañ

kyuuñ arsa-e-aflāk siyah-posh hai bolo

kis tarah zamīñ ho ga.ī gulnār mirī jaañ

kuchh phuul haiñ shāḳhoñ se abhī jhuul rahe haiñ

ruḳhsār pe rakkhe hue ruḳhsār mirī jaañ

rotā huuñ to sailāb se kaTtī haiñ zamīneñ

hañstā huuñ to Dhah jaate haiñ kohsār mirī jaañ

sunte haiñ falak-bos imārat hai tah-e-āb

kyā shahr thā kyā mauj kī raftār mirī jaañ

dil hai ki abhī dard ke narġhe meñ ghirā hai

chehra hai ki aalam meñ hai aḳhbār mirī jaañ

tā-umr na milne kī kasak saath rahegī

pahlā to nahīñ āḳhirī dīdār mirī jaañ

ghar-bar kahan kucha o bazar meri jaan

darwesh ko duniya nahin darkar meri jaan

ek shahr zamin-bos hai aamad pe tumhaari

raste mein bichhe hain dar-o-diwar meri jaan

kyun arsa-e-aflak siyah-posh hai bolo

kis tarah zamin ho gai gulnar meri jaan

kuchh phul hain shaKHon se abhi jhul rahe hain

ruKHsar pe rakkhe hue ruKHsar meri jaan

rota hun to sailab se kaTti hain zaminen

hansta hun to Dhah jate hain kohsar meri jaan

sunte hain falak-bos imarat hai tah-e-ab

kya shahr tha kya mauj ki raftar meri jaan

dil hai ki abhi dard ke narghe mein ghira hai

chehra hai ki aalam mein hai aKHbar meri jaan

ta-umr na milne ki kasak sath rahegi

pahla to nahin aaKHiri didar meri jaan