ghar banate waqt is ka dhyan hona chahiye

ghar banāte vaqt is kā dhyān honā chāhiye

dhuup rakhne ke liye dālān honā chāhiye

tang galiyoñ kī tarah hargiz na rasm-o-rāh ho

dostī meñ dil khulā maidān honā chāhiye

ḳhūbsūrat guftugū kyā isti.āroñ ke baġhair

is sahīfe ke liye juzdān honā chāhiye

ho sake taaza havā kā mahbas-e-jāñ meñ guzar

dil kī dīvāroñ meñ raushan-dān honā chāhiye

sirf gul-poshī nahīñ hai mehmānī kī dalīl

mezbāñ kī aañkh meñ gul-dān honā chāhiye

sāhib-e-fahm-o-darak hone pe bhī aulād ko

bāp-māñ ke sāmne nādān honā chāhiye

chand lamhoñ ko Thaharnā hai yahāñ jabki 'fahīm'

kam bahut hī kam sar-o-sāmān honā chāhiye

ghar banate waqt is ka dhyan hona chahiye

dhup rakhne ke liye dalan hona chahiye

tang galiyon ki tarah hargiz na rasm-o-rah ho

dosti mein dil khula maidan hona chahiye

KHubsurat guftugu kya istiaron ke baghair

is sahife ke liye juzdan hona chahiye

ho sake taza hawa ka mahbas-e-jaan mein guzar

dil ki diwaron mein raushan-dan hona chahiye

sirf gul-poshi nahin hai mehmani ki dalil

mezban ki aankh mein gul-dan hona chahiye

sahib-e-fahm-o-darak hone pe bhi aulad ko

bap-man ke samne nadan hona chahiye

chand lamhon ko Thaharna hai yahan jabki 'fahim'

kam bahut hi kam sar-o-saman hona chahiye