ghar darwaze se duri par sat samundar bich

ghar darvāze se duurī par saat samundar biich

ek anjāne dushman kī hai ghaat samundar biich

phir ye hārne vaalī āñkheñ jāgīñ is dhoke meñ

koī ḳhvāb bhañvar meñ aayā raat samundar biich

ab kyā ūñche bādbān par ḳhvāb sitāra chamke

āñkheñ rah ga.iiñ sāhil par aur haat samundar biich

is mausam meñ kaun kahāñ tak diyā jalā.e rakkhe

havā chale to Daal se TuuTe paat samundar biich

lahr se lahr mile to dekho qatre kī tanhā.ī

dil aisī ik buuñd kī kyā auqāt samundar biich

ek kahānī soch rahī hai mujh ko kaun kahe

ek jazīra Duub rahā hai zaat samundar biich

ek safar patvār kā apnā ek safar paanī kā

aur musāfir tanhā khā gayā maat samundar biich

ghar darwaze se duri par sat samundar bich

ek anjaane dushman ki hai ghat samundar bich

phir ye haarne wali aankhen jagin is dhoke mein

koi KHwab bhanwar mein aaya raat samundar bich

ab kya unche baadban par KHwab sitara chamke

aankhen rah gain sahil par aur hat samundar bich

is mausam mein kaun kahan tak diya jalae rakkhe

hawa chale to Dal se TuTe pat samundar bich

lahr se lahr mile to dekho qatre ki tanhai

dil aisi ek bund ki kya auqat samundar bich

ek kahani soch rahi hai mujh ko kaun kahe

ek jazira Dub raha hai zat samundar bich

ek safar patwar ka apna ek safar pani ka

aur musafir tanha kha gaya mat samundar bich