ghar ho ya bahar wahi kaDwi kasili guftugu

ghar ho yā bāhar vahī kaḌvī kasīlī guftugū

kab talak sunte raheñ ham ek jaisī guftugū

chand lamhoñ meñ bhaTak jaa.e jo mauzuāt se

be-sabab vo kyuuñ kiyā kartā hai ilmī guftugū

us ke lahje meñ to halkī sī nadāmat bhī nahīñ

ik taraf ham bhuul jaa.eñ pichhlī saarī guftugū

pal meñ rattī pal meñ māshā pal meñ raa.ī kā pahāḌ

pak chuke haiñ kaan sun sun kar siyāsī guftugū

ghar kiye baiThā hai dil meñ aaj tak ik ek lafz

kyā musībat ban ga.ī do-chār pal kī guftugū

ab koī apnā.e chāhe mustarad kar de mujhe

maiñ ġhazal meñ kar nahīñ pā.ūñgā nañgī guftugū

achchhe-ḳhāse log uTh jaate haiñ mahfil chhoḌ kar

jab kabhī hotī hai kuchh logoñ meñ adabī guftugū

ghar ho ya bahar wahi kaDwi kasili guftugu

kab talak sunte rahen hum ek jaisi guftugu

chand lamhon mein bhaTak jae jo mauzuat se

be-sabab wo kyun kiya karta hai ilmi guftugu

us ke lahje mein to halki si nadamat bhi nahin

ek taraf hum bhul jaen pichhli sari guftugu

pal mein ratti pal mein masha pal mein rai ka pahaD

pak chuke hain kan sun sun kar siyasi guftugu

ghar kiye baiTha hai dil mein aaj tak ek ek lafz

kya musibat ban gai do-chaar pal ki guftugu

ab koi apnae chahe mustarad kar de mujhe

main ghazal mein kar nahin paunga nangi guftugu

achchhe-KHase log uTh jate hain mahfil chhoD kar

jab kabhi hoti hai kuchh logon mein adabi guftugu