ghar jo arsa laga banane mein

ghar jo 'arsa lagā banāne meñ

der tum ne na kī jalāne meñ

kyoñ thā āḳhir itaab ye mujh par

kyā milā tujh ko yuuñ satāne meñ

muntazir muztarib thā dil merā

der tum ne lagā dī aane meñ

ek tum par hī kyoñ ye dil aayā

aur bhī log haiñ zamāne meñ

aarzū intizār ummīdeñ

ab yahī rah gayā fasāne meñ

tum bhī chāhat kī baat karte ho

tum jo māhir ho dil dukhāne meñ

lo usī kā kiyā dharā hai ye sab

zikr jis kā nahīñ fasāne meñ

yaañ to miltī nahīñ pazīrā.ī

'āfiyat hai yahāñ se jaane meñ

'umr 'izzat kamāne meñ guzrī

tum ne pal bhar liyā gañvāne meñ

kyoñ hai darpesh tum ko dushvārī

mujh ko ik baar phir manāne meñ

ab to bhaa.ī se ġhair haiñ behtar

kaisā dastūr hai zamāne meñ

rakhtī thī chiḌiyā saiñt ke bachche

aa gayā saañp āshiyāne meñ

ghar jo 'arsa laga banane mein

der tum ne na ki jalane mein

kyon tha aaKHir itab ye mujh par

kya mila tujh ko yun satane mein

muntazir muztarib tha dil mera

der tum ne laga di aane mein

ek tum par hi kyon ye dil aaya

aur bhi log hain zamane mein

aarzu intizar ummiden

ab yahi rah gaya fasane mein

tum bhi chahat ki baat karte ho

tum jo mahir ho dil dukhane mein

lo usi ka kiya dhara hai ye sab

zikr jis ka nahin fasane mein

yan to milti nahin pazirai

'afiyat hai yahan se jaane mein

'umr 'izzat kamane mein guzri

tum ne pal bhar liya ganwane mein

kyon hai darpesh tum ko dushwari

mujh ko ek bar phir manane mein

ab to bhai se ghair hain behtar

kaisa dastur hai zamane mein

rakhti thi chiDiya saint ke bachche

aa gaya sanp aashiyane mein