ghar ke andar bholi-bhaali suraten achchhi lagin

ghar ke andar bholī-bhālī sūrateñ achchhī lagīñ

muskurātī gul khilātī raunaqeñ achchhī lagīñ

jab sisaktī reñgtī sī zindagī dekhī kahīñ

phir ḳhudā kī dī huī sab nemateñ achchhī lagīñ

ek dil se dūsre dil tak safar karte rahe

rahguzār-e-shauq meñ ye hijrateñ achchhī lagīñ

dhuup ke lambe safar se lauT ke aa.e jo ghar

band kamre meñ sukūñ kī sā.ateñ achchhī lagīñ

dil kī duniyā hasratoñ ke dam se hī ābād hai

gaahe gaahe ham ko apnī hasrateñ achchhī lagīñ

jin gharoñ meñ azmat-e-rafta ke raushan the charāġh

un ke bām-o-dar hameñ un kī chhateñ achchhī lagīñ

aib apne chehre kā kis ko nazar aayā 'obaid'

aa.ine meñ sab ko apnī sūrateñ achchhī lagīñ

ghar ke andar bholi-bhaali suraten achchhi lagin

muskuraati gul khilati raunaqen achchhi lagin

jab sisakti rengti si zindagi dekhi kahin

phir KHuda ki di hui sab nematen achchhi lagin

ek dil se dusre dil tak safar karte rahe

rahguzar-e-shauq mein ye hijraten achchhi lagin

dhup ke lambe safar se lauT ke aae jo ghar

band kamre mein sukun ki saaten achchhi lagin

dil ki duniya hasraton ke dam se hi aabaad hai

gahe gahe hum ko apni hasraten achchhi lagin

jin gharon mein azmat-e-rafta ke raushan the charagh

un ke baam-o-dar hamein un ki chhaten achchhi lagin

aib apne chehre ka kis ko nazar aaya 'obaid'

aaine mein sab ko apni suraten achchhi lagin