ghar ki diwaron ko humne aur uncha kar liya

ghar kī dīvāroñ ko ham ne aur ūñchā kar liyā

shor-e-sad-e-mahshar sunā aur ḳhud ko bahrā kar liyā

band naafe kī tarah rahte haiñ apne aap meñ

apnī ḳhushbū se mo.attar dil kā sahrā kar liyā

dard mahjūrī kā ā.īna hai apne rū-ba-rū

jab nazar aayā na to apnā tamāshā kar liyā

dar pe har ummīd ke phailā diyā dāmān-e-dil

kaj-kulāh-e-zindagī ne ḳhud ko rusvā kar liyā

ham samajhte haiñ tire malbūs kī tauqīr ko

dāġh-e-uryānī nazar aayā to pardā kar liyā

jab koī sūrat nazar aa.ī na hañsne kī 'nadīm'

ġham kī har tasvīr ko āñkhoñ meñ yakjā kar liyā

ghar ki diwaron ko hum ne aur uncha kar liya

shor-e-sad-e-mahshar suna aur KHud ko bahra kar liya

band nafe ki tarah rahte hain apne aap mein

apni KHushbu se moattar dil ka sahra kar liya

dard mahjuri ka aaina hai apne ru-ba-ru

jab nazar aaya na to apna tamasha kar liya

dar pe har ummid ke phaila diya daman-e-dil

kaj-kulah-e-zindagi ne KHud ko ruswa kar liya

hum samajhte hain tere malbus ki tauqir ko

dagh-e-uryani nazar aaya to parda kar liya

jab koi surat nazar aai na hansne ki 'nadim'

gham ki har taswir ko aankhon mein yakja kar liya