ghar ki uljhan se tabiat yun rahi uljhi hui

ghar kī uljhan se tabī'at yuuñ rahī uljhī huī

Tebaloñ pe jaise file shaam tak bikhrī huī

aaj saarā din hī us ne muntashir rakhā mujhe

raat kī kaḌvāhaToñ se chaa.e jo kaḌvī huī

vo saḌak ke moḌ par insān thā martā huā

yā thī us ke saath meñ insāniyat martī huī

aap ke kahne se kar luuñ kaise duniyā pe yaqīñ

aap bhī dekhe hue haiñ duniyā bhī dekhī huī

shahr chhoḌe us ko to barsoñ hue ham aaj bhī

dekhte haiñ rail-gāḌī duur tak jaatī huī

yuuñ ḳhizāñ ke daur meñ shādāb rakhtī thī mujhe

jaise chaḌhtī bel sūkhe peḌ se lipTī huī

nanhe-munne phuul saare ek dam se khil ga.e

garmiyoñ ke din lage schōl kī chhuTTī huī

tū ne jo bheje the message ab bhī mobile meñ haiñ

save hai tasvīr saarī gallery meñ kī huī

rāste bhar 'nūr' mere saath meñ chalte rahe

chehra vo utrā huā sā aañkh vo bujhtī huī

ghar ki uljhan se tabi'at yun rahi uljhi hui

Tebalon pe jaise file sham tak bikhri hui

aaj sara din hi us ne muntashir rakha mujhe

raat ki kaDwahaTon se chae jo kaDwi hui

wo saDak ke moD par insan tha marta hua

ya thi us ke sath mein insaniyat marti hui

aap ke kahne se kar lun kaise duniya pe yaqin

aap bhi dekhe hue hain duniya bhi dekhi hui

shahr chhoDe us ko to barson hue hum aaj bhi

dekhte hain rail-gaDi dur tak jati hui

yun KHizan ke daur mein shadab rakhti thi mujhe

jaise chaDhti bel sukhe peD se lipTi hui

nanhe-munne phul sare ek dam se khil gae

garmiyon ke din lage school ki chhuTTi hui

tu ne jo bheje the message ab bhi mobile mein hain

sawe hai taswir sari gallery mein ki hui

raste bhar 'nur' mere sath mein chalte rahe

chehra wo utra hua sa aankh wo bujhti hui