گھر کو میدان ہمیں بے سر و سامان کیا

گھر کو میدان ہمیں بے سر و سامان کیا

آندھیو تم نے بھرے شہر کو ویران کیا

کام دشوار تھا ہم نے اسے آسان کیا

کاغذی پھول سے تتلی کو پریشان کیا

اپنی روداد رقم کی تو اک اسلوب سے کی

درد کو متن کیا زخم کو عنوان کیا

یہ وراثت کئی صدیوں سے چلی آتی ہے

گھر پہ دشمن بھی کوئی آیا تو مہمان کیا

مشغلہ شعر و سخن کا نہیں آساں صاحب

درد و غم کتنے کئے جمع تو دیوان کیا

فیصلہ پنچ نے کچھ اور سنایا لیکن

گاؤں کے لوگوں نے کچھ اور ہی اعلان کیا

میں اسے کیسے سر آنکھوں پہ بٹھاتا شادابؔ

جس نے سمان جتا کر مرا اپمان کیا