ghar mein bashinde to ek naz mein mar jate hain

ghar meñ bāshinde to ik naaz meñ mar jaate haiñ

aur jo ham-sā.e haiñ āvāz meñ mar jaate haiñ

kabk o tā.ūs ko chaltā hai tū Thahrā ke to ham

terī raftār ke andāz meñ mar jaate haiñ

muzhda ai yaas ki yaañ kunj-e-qafas ke qaidī

yak-ba-yak mausam-e-parvāz meñ mar jaate haiñ

haiñ tire ramz-e-tabassum ke adā-fahm jo shaḳhs

jumbish-e-la.al-e-fusūñ-sāz meñ mar jaate haiñ

lab hilāne nahīñ paatā vo ki ham nādīda

bas vahīñ baat ke āġhāz meñ mar jaate haiñ

tausan-e-nāz ko pheñke hai vo jis dam sarpaT

log kyā kyā na tag-o-tāz meñ mar jaate haiñ

'mus.hafī' dasht-e-balā kā safar āsān hai kyā

saikaḌoñ basra o shīrāz meñ mar jaate haiñ

ghar mein bashinde to ek naz mein mar jate hain

aur jo ham-sae hain aawaz mein mar jate hain

kabk o taus ko chalta hai tu Thahra ke to hum

teri raftar ke andaz mein mar jate hain

muzhda ai yas ki yan kunj-e-qafas ke qaidi

yak-ba-yak mausam-e-parwaz mein mar jate hain

hain tere ramz-e-tabassum ke ada-fahm jo shaKHs

jumbish-e-lal-e-fusun-saz mein mar jate hain

lab hilane nahin pata wo ki hum nadida

bas wahin baat ke aaghaz mein mar jate hain

tausan-e-naz ko phenke hai wo jis dam sarpaT

log kya kya na tag-o-taz mein mar jate hain

'mushafi' dasht-e-bala ka safar aasan hai kya

saikaDon basra o shiraaz mein mar jate hain