ghar mein chizen baDh rahi hain zindagi kam ho rahi hai

ghar meñ chīzeñ baḌh rahī haiñ zindagī kam ho rahī hai

dhīre dhīre ghar kī apnī raushnī kam ho rahī hai

shahr ke bāzār kī raunaq meñ dil bujhne lage haiñ

ḳhuub ḳhush hone kī ḳhvāhish meñ ḳhushī kam ho rahī hai

ab kisī ko bhī chhuo lagtā hai pahle se chhuā sā

vo jo thī pahle-pahal kī sansanī kam ho rahī hai

tai-shuda lafzoñ meñ karte haiñ ham iz.hār-e-mohabbat

ab to pahle ishq meñ bhī an-kahī kam ho rahī hai

le gayā ye shahr us ko mere pahlū se uThā kar

mujh ko lagtā hai mirī dīvāngī kam ho rahī hai

husn kā bāzār aanā jaanā bhī kuchh baḌh rahā hai

kuchh mirī āñkhoñ kī bhī pākīzgī kam ho rahī hai

vaqt DanDī mārtā hai tolne meñ merā hissa

din bhī chhoTe paḌ rahe haiñ raat bhī kam ho rahī hai

shahr kī koshish ki ḳhud ko aur pechīda banā le

merī ye tashvīsh merī sādgī kam ho rahī hai

sāhiloñ kī bastiyāñ ye dekh kar ḳhāmosh kyuuñ haiñ

bastiyoñ ke phailne se hī nadī kam ho rahī hai

shaam aate hī tumheñ rahtī hai ghar jaane kī jaldī

'farhat-ehsās' in dinoñ āvārgī kam ho rahī hai

ghar mein chizen baDh rahi hain zindagi kam ho rahi hai

dhire dhire ghar ki apni raushni kam ho rahi hai

shahr ke bazar ki raunaq mein dil bujhne lage hain

KHub KHush hone ki KHwahish mein KHushi kam ho rahi hai

ab kisi ko bhi chhuo lagta hai pahle se chhua sa

wo jo thi pahle-pahal ki sansani kam ho rahi hai

tai-shuda lafzon mein karte hain hum izhaar-e-mohabbat

ab to pahle ishq mein bhi an-kahi kam ho rahi hai

le gaya ye shahr us ko mere pahlu se uTha kar

mujh ko lagta hai meri diwangi kam ho rahi hai

husn ka bazar aana jaana bhi kuchh baDh raha hai

kuchh meri aankhon ki bhi pakizgi kam ho rahi hai

waqt DanDi marta hai tolne mein mera hissa

din bhi chhoTe paD rahe hain raat bhi kam ho rahi hai

shahr ki koshish ki KHud ko aur pechida bana le

meri ye tashwish meri sadgi kam ho rahi hai

sahilon ki bastiyan ye dekh kar KHamosh kyun hain

bastiyon ke phailne se hi nadi kam ho rahi hai

sham aate hi tumhein rahti hai ghar jaane ki jaldi

'farhat-ehsas' in dinon aawargi kam ho rahi hai