ghar mein nazar aati nahin gham-KHwar ki surat

ghar meñ nazar aatī nahīñ ġham-ḳhvār kī sūrat

takte haiñ paḌe ham dar-o-dīvār kī sūrat

chhuptī hī nahīñ ishq ke bīmār kī sūrat

kuchh aur hī hotī hai is āzād kī sūrat

va.ade pe banā.ī to hai iqrār kī sūrat

āñkhoñ se ayaañ hai magar inkār kī sūrat

jab vasl meñ kuchh hotī hai takrār kī sūrat

dil biich meñ aa jaatā hai dīvār kī sūrat

karte haiñ kuchh is shaan se vo vasl kā va.ada

iqrār kī sūrat hai na inkār kī sūrat

kī diid kī ḳhvāhish to vo muñh pher ke bole

dekhe to koī tālib-e-dīdār kī sūrat

'mahmūd' karam dekh ke zāhid ne sar-e-hashr

ye chāhā ki ban jā.ūñ gunahgār kī sūrat

ghar mein nazar aati nahin gham-KHwar ki surat

takte hain paDe hum dar-o-diwar ki surat

chhupti hi nahin ishq ke bimar ki surat

kuchh aur hi hoti hai is aazad ki surat

wade pe banai to hai iqrar ki surat

aankhon se ayan hai magar inkar ki surat

jab wasl mein kuchh hoti hai takrar ki surat

dil bich mein aa jata hai diwar ki surat

karte hain kuchh is shan se wo wasl ka wada

iqrar ki surat hai na inkar ki surat

ki did ki KHwahish to wo munh pher ke bole

dekhe to koi talib-e-didar ki surat

'mahmud' karam dekh ke zahid ne sar-e-hashr

ye chaha ki ban jaun gunahgar ki surat