ghar se ab bahar nikalne mein bhi ghabraate hain hum

ghar se ab bāhar nikalne meñ bhī ghabrāte haiñ ham

sañg-bārī ho kahīñ bhī zad meñ aa jaate haiñ ham

aa gale lag jā hamāre tīrgī-e-shām-e-ġham

raushnī ke naam par dhoke bahut khāte haiñ ham

un kā kahnā hai ki bas tark-e-ta.alluq ho chukā

ham ye kahte haiñ ki ab tanhā rahe jaate haiñ ham

yuuñ to duniyā ne bhī rakkhā hai nishāne par hameñ

vahshat-e-dil se bhī kuchh āb-o-havā paate haiñ ham

us ke ruḳh par Dālte haiñ ik uchaTtī sī nazar

aur phir fikr-e-suḳhan meñ ġharq ho jaate haiñ ham

hañs ke kar lete haiñ vo apne sitam kā e'tirāf

aur un kī is adā par qatl ho jaate haiñ ham

dekhte haiñ muskurā kar apne bachchoñ kī taraf

jab thakan kā bojh oḌhe apne ghar aate haiñ ham

is qadar hālāt ne 'nāzir' badal Daalā hameñ

dostoñ ke darmiyāñ ab kam nazar aate haiñ ham

ghar se ab bahar nikalne mein bhi ghabraate hain hum

sang-bari ho kahin bhi zad mein aa jate hain hum

aa gale lag ja hamare tirgi-e-sham-e-gham

raushni ke nam par dhoke bahut khate hain hum

un ka kahna hai ki bas tark-e-talluq ho chuka

hum ye kahte hain ki ab tanha rahe jate hain hum

yun to duniya ne bhi rakkha hai nishane par hamein

wahshat-e-dil se bhi kuchh aab-o-hawa pate hain hum

us ke ruKH par Dalte hain ek uchaTti si nazar

aur phir fikr-e-suKHan mein gharq ho jate hain hum

hans ke kar lete hain wo apne sitam ka e'tiraf

aur un ki is ada par qatl ho jate hain hum

dekhte hain muskura kar apne bachchon ki taraf

jab thakan ka bojh oDhe apne ghar aate hain hum

is qadar haalat ne 'nazir' badal Dala hamein

doston ke darmiyan ab kam nazar aate hain hum