gharon mein sote sote log har raat uThne lagte hain

gharoñ meñ sote sote log har raat uThne lagte haiñ

to ābādī meñ kyā kyā inqilābāt uThne lagte haiñ

nahīñ uThte agar so.e hue sultān to ik din

jo qaabū meñ nahīñ aate vo hālāt uThne lagte haiñ

javāb aane meñ lag jaatī haiñ aksar muddateñ lekin

javāb aate hī sar meñ phir savālāt uThne lagte haiñ

vo kartā hai nihāyat bā-dil-e-nā-ḳhvāsta ruḳhsat

jab us ke paas se ham be-mudārāt uThne lagte haiñ

koī sadma nahīñ uThtā shurū-e-ishq meñ tāham

ba-tadrīj aadmī se saare sadmāt uThne lagte haiñ

'shu.ūr' apne laboñ par tum ḳhushī se muhr lagne do

dabāne se to afkār-o-ḳhayālāt uThne lagte haiñ

gharon mein sote sote log har raat uThne lagte hain

to aabaadi mein kya kya inqilabaat uThne lagte hain

nahin uThte agar soe hue sultan to ek din

jo qabu mein nahin aate wo haalat uThne lagte hain

jawab aane mein lag jati hain aksar muddaten lekin

jawab aate hi sar mein phir sawalat uThne lagte hain

wo karta hai nihayat ba-dil-e-na-KHwasta ruKHsat

jab us ke pas se hum be-mudaraat uThne lagte hain

koi sadma nahin uThta shuru-e-ishq mein taham

ba-tadrij aadmi se sare sadmat uThne lagte hain

'shuur' apne labon par tum KHushi se muhr lagne do

dabane se to afkar-o-KHayalat uThne lagte hain