ghaTa ho bagh ho pahlu mein apne yar-e-jaani ho

ghaTā ho baaġh ho pahlū meñ apne yār-e-jānī ho

jo ye sāmāñ mayassar ho to lutf-e-zindagānī ho

maza kyā ḳhizr kī sūrat jo umr-e-jāvedānī ho

ham us jiine se baaz aa.e jo tanhā zindagānī ho

ghaTā hai sāqiyā sāmān-e-vasl-e-yār-e-jānī ho

labālab har surāhī meñ sharāb-e-arġhavānī ho

ḳhizāñ meñ kahte haiñ pīr-e-muġhāñ se rind-mashrab yuuñ

bahār aa.ī kahīñ daur-e-sharāb-e-arġhavānī ho

kisī yūsuf-liqā par dil jo aa.e ahd-e-pīrī meñ

na.e sar se zuleḳhā kī sifat phir naujavānī ho

mujhe shauq-e-shahādat tishna-lab laayā hai maqtal meñ

pilā de āb-e-ḳhanjar pyaas agar qātil bujhānī ho

vo mujrim huuñ kahūñgā hashr meñ allāh se ro kar

jahannum se maiñ bach jā.ūñ jo terī mehrbānī ho

mohabbat in butān-e-sang-dil se dekh kar karnā

shab-e-furqat kī iizā gar tujhe ai dil uThānī ho

tirī tasvīr ai jaañ khīñch le kyā taab rakhtā hai

nazar bhar kar agar dekhe tujhe behosh maanī ho

piye jaatā huuñ ḳhum ke ḳhum vo mai-ḳhāne meñ mai-kash huuñ

pilā.e jā mujhe saaqī jahāñ tak mai pilānī ho

habāb-e-bahr kī sūrat nahīñ dam bhar sabāt is ko

mirī nazroñ meñ phir duniyā-e-dūñ kyūñkar na faanī ho

khaḌā huuñ tuur par kab se mujhe dīdār dikhlā do

kalīm-ullāh jab aa.eñ to un se lan-tarānī ho

'vafā' bahr-e-ḳhudā chhoḌo mohabbat in hasīnoñ kī

butoñ ke hijr meñ aisā na ho zaa.e.a javānī ho

ghaTa ho bagh ho pahlu mein apne yar-e-jaani ho

jo ye saman mayassar ho to lutf-e-zindagani ho

maza kya KHizr ki surat jo umr-e-jawedani ho

hum us jine se baz aae jo tanha zindagani ho

ghaTa hai saqiya saman-e-wasl-e-yar-e-jaani ho

labaalab har surahi mein sharab-e-arghawani ho

KHizan mein kahte hain pir-e-mughan se rind-mashrab yun

bahaar aai kahin daur-e-sharab-e-arghawani ho

kisi yusuf-liqa par dil jo aae ahd-e-piri mein

nae sar se zuleKHa ki sifat phir naujawani ho

mujhe shauq-e-shahadat tishna-lab laya hai maqtal mein

pila de aab-e-KHanjar pyas agar qatil bujhani ho

wo mujrim hun kahunga hashr mein allah se ro kar

jahannum se main bach jaun jo teri mehrbani ho

mohabbat in butan-e-sang-dil se dekh kar karna

shab-e-furqat ki iza gar tujhe ai dil uThani ho

teri taswir ai jaan khinch le kya tab rakhta hai

nazar bhar kar agar dekhe tujhe behosh mani ho

piye jata hun KHum ke KHum wo mai-KHane mein mai-kash hun

pilae ja mujhe saqi jahan tak mai pilani ho

habab-e-bahr ki surat nahin dam bhar sabaat is ko

meri nazron mein phir duniya-e-dun kyunkar na fani ho

khaDa hun tur par kab se mujhe didar dikhla do

kalim-ullah jab aaen to un se lan-tarani ho

'wafa' bahr-e-KHuda chhoDo mohabbat in hasinon ki

buton ke hijr mein aisa na ho zaea jawani ho