ghaTaen raqs karti hain ye mausam raqs karte hain

ghaTā.eñ raqs kartī haiñ ye mausam raqs karte haiñ

vo zulfoñ ko jab apnī kar ke pur-nam raqs karte haiñ

baḌī mastī baḌī gahrā.ī hai un shoḳh āñkhoñ meñ

unhīñ meñ mast ho kar donoñ aalam raqs karte haiñ

havā.eñ aane lagtī haiñ kabhī jab un ke dāman kī

diye bhī kar ke apnī lau ko maddham raqs karte haiñ

tumhāre hijr kī rātoñ meñ jab tanhā.ī Dastī hai

bajā kar apnī ham sāñsoñ kī sargam raqs karte haiñ

bahāroñ jhūmne lagtī haiñ un kā naam sunte hī

sajā lete haiñ gul hoñToñ pe shabnam raqs karte haiñ

miyāñ ham to qalandar haiñ hamārā haal mat pūchho

hamāre siine meñ kitne hī sañgam raqs karte haiñ

kabhī jab mil ke aate haiñ kahīñ tanhā.ī meñ un se

darīche band kar lete haiñ aur ham raqs karte haiñ

hazāroñ bijliyāñ sadqe meñ un ke TuuT jaatī haiñ

pahan ke nuur kī paa.el jo hamdam raqs karte haiñ

'nadīm' apnī adā aisī hai jis ke sāmne aa kar

ḳhushī mad.hosh ho jaatī hai aur ġham raqs karte haiñ

ghaTaen raqs karti hain ye mausam raqs karte hain

wo zulfon ko jab apni kar ke pur-nam raqs karte hain

baDi masti baDi gahrai hai un shoKH aankhon mein

unhin mein mast ho kar donon aalam raqs karte hain

hawaen aane lagti hain kabhi jab un ke daman ki

diye bhi kar ke apni lau ko maddham raqs karte hain

tumhaare hijr ki raaton mein jab tanhai Dasti hai

baja kar apni hum sanson ki sargam raqs karte hain

bahaaron jhumne lagti hain un ka nam sunte hi

saja lete hain gul honTon pe shabnam raqs karte hain

miyan hum to qalandar hain hamara haal mat puchho

hamare sine mein kitne hi sangam raqs karte hain

kabhi jab mil ke aate hain kahin tanhai mein un se

dariche band kar lete hain aur hum raqs karte hain

hazaron bijliyan sadqe mein un ke TuT jati hain

pahan ke nur ki pael jo hamdam raqs karte hain

'nadim' apni ada aisi hai jis ke samne aa kar

KHushi madhosh ho jati hai aur gham raqs karte hain