achchhi surat pe ghazab TuT ke aana dil ka
Interesting Fact
Film : Jaanisaar 2015
achchhī sūrat pe ġhazab TuuT ke aanā dil kā
yaad aatā hai hameñ haa.e zamānā dil kā
tum bhī muñh chuum lo be-sāḳhta pyaar aa jaa.e
maiñ sunā.ūñ jo kabhī dil se fasānā dil kā
nigah-e-yār ne kī ḳhāna-ḳharābī aisī
na Thikānā hai jigar kā na Thikānā dil kā
puurī mehñdī bhī lagānī nahīñ aatī ab tak
kyūñkar aayā tujhe ġhairoñ se lagānā dil kā
ġhuncha-e-gul ko vo muTThī meñ liye aate the
maiñ ne pūchhā to kiyā mujh se bahānā dil kā
in hasīnoñ kā laḌakpan hī rahe yā allāh
hosh aatā hai to aatā hai satānā dil kā
de ḳhudā aur jagah siina o pahlū ke sivā
ki bure vaqt meñ ho jaa.e Thikānā dil kā
merī āġhosh se kyā hī vo taḌap kar nikle
un kā jaanā thā ilāhī ki ye jaanā dil kā
nigah-e-sharm ko be-tāb kiyā kaam kiyā
rañg laayā tirī āñkhoñ meñ samānā dil kā
uñgliyāñ tār-e-garebāñ meñ ulajh jaatī haiñ
saḳht dushvār hai hāthoñ se dabānā dil kā
huur kī shakl ho tum nuur ke putle ho tum
aur is par tumheñ aatā hai jalānā dil kā
chhoḌ kar us ko tirī bazm se kyūñkar jā.ūñ
ik janāze kā uThānā hai uThānā dil kā
be-dilī kā jo kahā haal to farmāte haiñ
kar liyā tū ne kahīñ aur Thikānā dil kā
ba.ad muddat ke ye ai 'dāġh' samajh meñ aayā
vahī daanā hai kahā jis ne na maanā dil kā
achchhi surat pe ghazab TuT ke aana dil ka
yaad aata hai hamein hae zamana dil ka
tum bhi munh chum lo be-saKHta pyar aa jae
main sunaun jo kabhi dil se fasana dil ka
nigah-e-yar ne ki KHana-KHarabi aisi
na Thikana hai jigar ka na Thikana dil ka
puri mehndi bhi lagani nahin aati ab tak
kyunkar aaya tujhe ghairon se lagana dil ka
ghuncha-e-gul ko wo muTThi mein liye aate the
main ne puchha to kiya mujh se bahana dil ka
in hasinon ka laDakpan hi rahe ya allah
hosh aata hai to aata hai satana dil ka
de KHuda aur jagah sina o pahlu ke siwa
ki bure waqt mein ho jae Thikana dil ka
meri aaghosh se kya hi wo taDap kar nikle
un ka jaana tha ilahi ki ye jaana dil ka
nigah-e-sharm ko be-tab kiya kaam kiya
rang laya teri aankhon mein samana dil ka
ungliyan tar-e-gareban mein ulajh jati hain
saKHt dushwar hai hathon se dabana dil ka
hur ki shakl ho tum nur ke putle ho tum
aur is par tumhein aata hai jalana dil ka
chhoD kar us ko teri bazm se kyunkar jaun
ek janaze ka uThana hai uThana dil ka
be-dili ka jo kaha haal to farmate hain
kar liya tu ne kahin aur Thikana dil ka
baad muddat ke ye ai 'dagh' samajh mein aaya
wahi dana hai kaha jis ne na mana dil ka
- Book : Kulliyat-e-daag(mehtaab-e-daag (Pg. 4)
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
