aap apna ghubar the hum to

aap apnā ġhubār the ham to

yaad the yādgār the ham to

pardagī ham se kyuuñ rakhā parda

tere hī parda-dār the ham to

vaqt kī dhuup meñ tumhāre liye

shajar-e-sāya-dār the ham to

uḌe jaate haiñ dhuul ke mānind

āñdhiyoñ par savār the ham to

ham ne kyuuñ ḳhud pe e.atibār kiyā

saḳht be-e'tibār the ham to

sharm hai apnī baar baarī kī

be-sabab baar baar the ham to

kyuuñ hameñ kar diyā gayā majbūr

ḳhud hī be-iḳhtiyār the ham to

tum ne kaise bhulā diyā ham ko

tum se hī musta.ār the ham to

ḳhush na aayā hameñ jiye jaanā

lamhe lamhe pe baar the ham to

sah bhī lete hamāre ta.anoñ ko

jān-e-man jāñ-nisār the ham to

ḳhud ko daurān-e-hāl meñ apne

be-tarah nāgavār the ham to

tum ne ham ko bhī kar diyā barbād

nādir-e-rozgār the ham to

ham ko yāroñ ne yaad bhī na rakhā

'jaun' yāroñ ke yaar the ham to

aap apna ghubar the hum to

yaad the yaadgar the hum to

pardagi hum se kyun rakha parda

tere hi parda-dar the hum to

waqt ki dhup mein tumhaare liye

shajar-e-saya-dar the hum to

uDe jate hain dhul ke manind

aandhiyon par sawar the hum to

hum ne kyun KHud pe eatibar kiya

saKHt be-e'tibar the hum to

sharm hai apni bar bari ki

be-sabab bar bar the hum to

kyun hamein kar diya gaya majbur

KHud hi be-iKHtiyar the hum to

tum ne kaise bhula diya hum ko

tum se hi mustaar the hum to

KHush na aaya hamein jiye jaana

lamhe lamhe pe bar the hum to

sah bhi lete hamare tanon ko

jaan-e-man jaan-nisar the hum to

KHud ko dauran-e-haal mein apne

be-tarah nagawar the hum to

tum ne hum ko bhi kar diya barbaad

nadir-e-rozgar the hum to

hum ko yaron ne yaad bhi na rakha

'jaun' yaron ke yar the hum to