andheri shab hai meri jaan zara sa soch to le

añdherī shab hai mirī jaañ zarā sā soch to le

bujhā charāġh kabhī kaam aa hī jaatā hai

kisī kā naam pukāreñ kisī ko yaad kareñ

hamāre lab pe tirā naam aa hī jaatā hai

davā-e-dard-e-jigar jab bhī māñgtā huuñ maiñ

to mere sāmne ik jaam aa hī jaatā hai

ḳhatā.eñ shahr kā hākim kare yā aur koī

magar ġharīb pe ilzām aa hī jaatā hai

chale the ham ki abhī ibtidā-e-ulfat hai

kise ḳhabar thī ki anjām aa hī jaatā hai

jo mujh pe pahre lagātā hai us ko ilm nahīñ

vo shahr-e-dil meñ sar-e-ām aa hī jaatā hai

tujhe bhulāne kī koshish to kar rahā huuñ 'ḳhalīl'

ḳhayāl terā sar-e-shām aa hī jaatā hai

andheri shab hai meri jaan zara sa soch to le

bujha charagh kabhi kaam aa hi jata hai

kisi ka nam pukaren kisi ko yaad karen

hamare lab pe tera nam aa hi jata hai

dawa-e-dard-e-jigar jab bhi mangta hun main

to mere samne ek jam aa hi jata hai

KHataen shahr ka hakim kare ya aur koi

magar gharib pe ilzam aa hi jata hai

chale the hum ki abhi ibtida-e-ulfat hai

kise KHabar thi ki anjam aa hi jata hai

jo mujh pe pahre lagata hai us ko ilm nahin

wo shahr-e-dil mein sar-e-am aa hi jata hai

tujhe bhulane ki koshish to kar raha hun 'KHalil'

KHayal tera sar-e-sham aa hi jata hai