ghera Dale hue hai dushman bachne ke aasar kahan

gherā Daale hue hai dushman bachne ke āsār kahāñ

ḳhālī haath khaḌe ho 'pāshī' rakh aa.e talvār kahāñ

kyuuñ logoñ se mehr-o-vafā kī aas lagā.e baiThe ho

jhuuT ke is makrūh nagar meñ logoñ kā kirdār kahāñ

kyā hasrat se dekh rahe haiñ hameñ ye jagmag se sāhil

haa.e hamāre hāthoñ se bhī chhūTe haiñ patvār kahāñ

ḳhatm huā har ḳhvāb-e-tamāshā raakh huā har shahr-e-sadā

dasht hai har sū tanhā.ī kā hue haiñ ham bedār kahāñ

duur duur tak koī nahīñ ab tujhe bachā le jo aa kar

daad to de dushman ko 'pāshī'! kiyā hai us ne vaar kahāñ

ghera Dale hue hai dushman bachne ke aasar kahan

KHali hath khaDe ho 'pashi' rakh aae talwar kahan

kyun logon se mehr-o-wafa ki aas lagae baiThe ho

jhuT ke is makruh nagar mein logon ka kirdar kahan

kya hasrat se dekh rahe hain hamein ye jagmag se sahil

hae hamare hathon se bhi chhuTe hain patwar kahan

KHatm hua har KHwab-e-tamasha rakh hua har shahr-e-sada

dasht hai har su tanhai ka hue hain hum bedar kahan

dur dur tak koi nahin ab tujhe bacha le jo aa kar

dad to de dushman ko 'pashi'! kiya hai us ne war kahan