ghuT-ghuT ke tere ishq mein kitna raha hun main

ghuT-ghuT ke tere 'ishq meñ kitnā rahā huuñ maiñ

itnā ki apne saath bhī tanhā rahā huuñ maiñ

nā-paidā maiñ hayāt-o-qazā ke bharam sā huuñ

hotā rahā huuñ saath meñ khotā rahā huuñ maiñ

āñkheñ charāġh-e-muflisāñ se kam nahīñ mirī

har ashk ko sañbhāl ke rotā rahā huuñ maiñ

phir dil chalā na jaa.e kahīñ 'ishq-e-dost meñ

dushman hī ḳhud ko aap kā Thahrā rahā huuñ maiñ

dil meñ lage ki tan meñ lage aag aag hai

zinda chitā sā 'ishq meñ jaltā rahā huuñ maiñ

kahtā thā maar Dālegā marnā tirā mujhe

kaise batā.ūñ tujh ko ki jiitā rahā huuñ maiñ

detā vajah tū kaash mujhe tark-e-'ishq kī

zulm apne hī ḳhayāl ke sahtā rahā huuñ maiñ

maiñ bhāgtā rahā huuñ haqīqat se 'ishq kī

aur 'ishq ke ḳhayāl meñ baiThā rahā huuñ maiñ

she'r-o-suḳhan kī raah meñ tanhā.ī saath hai

jo bhī ye boltī hai so dohrā rahā huuñ maiñ

ghuT-ghuT ke tere 'ishq mein kitna raha hun main

itna ki apne sath bhi tanha raha hun main

na-paida main hayat-o-qaza ke bharam sa hun

hota raha hun sath mein khota raha hun main

aankhen charagh-e-muflisan se kam nahin meri

har ashk ko sanbhaal ke rota raha hun main

phir dil chala na jae kahin 'ishq-e-dost mein

dushman hi KHud ko aap ka Thahra raha hun main

dil mein lage ki tan mein lage aag aag hai

zinda chita sa 'ishq mein jalta raha hun main

kahta tha mar Dalega marna tera mujhe

kaise bataun tujh ko ki jita raha hun main

deta wajah tu kash mujhe tark-e-'ishq ki

zulm apne hi KHayal ke sahta raha hun main

main bhagta raha hun haqiqat se 'ishq ki

aur 'ishq ke KHayal mein baiTha raha hun main

she'r-o-suKHan ki rah mein tanhai sath hai

jo bhi ye bolti hai so dohra raha hun main