gili lakDi ko sulga kar ashkon se arzi likhunga

giilī lakḌī ko sulgā kar ashkoñ se arzī likhūñgā

aaj dhueñ ke bādal par maiñ bārish ko chiTThī likhūñgā

is zindāñ ke kuchh qaidī hī merī baat samajh pā.eñge

jab patthar kī dīvāroñ par miTTī se miTTī likhūñgā

mujh jaise kuchh dīvāne hī zinda dil hote haiñ sāhab

maiñ itnā kamzor nahīñ jo pankhā aur rassī likhūñgā

kab tak ghar meñ baiThe baiThe apne dil ke chhāle phoḌūñ

ab to in taptī saḌkoñ par āvāra-gardī likhūñgā

ham donoñ hī apnī apnī fitrat ke maare insāñ haiñ

tū mujh meñ ḳhāmī DhūñDegā maiñ terī ḳhūbī likhūñgā

kuchh aise tahrīr karūñgā ik misre meñ do afsāne

dariyā ko sāhil likhūñgā tūfāñ ko kashtī likhūñgā

gili lakDi ko sulga kar ashkon se arzi likhunga

aaj dhuen ke baadal par main barish ko chiTThi likhunga

is zindan ke kuchh qaidi hi meri baat samajh paenge

jab patthar ki diwaron par miTTi se miTTi likhunga

mujh jaise kuchh diwane hi zinda dil hote hain sahab

main itna kamzor nahin jo pankha aur rassi likhunga

kab tak ghar mein baiThe baiThe apne dil ke chhaale phoDun

ab to in tapti saDkon par aawara-gardi likhunga

hum donon hi apni apni fitrat ke mare insan hain

tu mujh mein KHami DhunDega main teri KHubi likhunga

kuchh aise tahrir karunga ek misre mein do afsane

dariya ko sahil likhunga tufan ko kashti likhunga