gil bhik mein lete hain jis phul se ranai

gil bhiik meñ lete haiñ jis phuul se ra.anā.ī

ham ko bhī mayassar hai us naam se tanhā.ī

donoñ ke muqaddar kī gardish hī nirālī hai

ye qalb thakā-hārā vo lāla-e-sahrā.ī

kyuuñ ḳhalq kā shauq aayā koī kibr se jā pūchhe

kyā chiiz thī tanhā.ī? kyā ḳhuub thī yaktā.ī?

yak-tarfa mohabbat kā har rañg nirālā hai

begāna kare jag se ye rahmat-e-rusvā.ī

taḌpe haiñ malā.ek bhī vo qahr thā ā.ankhoñ meñ

dekhā tirā shaidā.ī to maut bhī ghabrā.ī

dam sādhe vo shab aayā ik diip jalā laayā

turbat pe asīroñ kī bajtī rahī shahnā.ī

gil bhik mein lete hain jis phul se ranai

hum ko bhi mayassar hai us nam se tanhai

donon ke muqaddar ki gardish hi nirali hai

ye qalb thaka-haara wo lala-e-sahrai

kyun KHalq ka shauq aaya koi kibr se ja puchhe

kya chiz thi tanhai? kya KHub thi yaktai?

yak-tarfa mohabbat ka har rang nirala hai

begana kare jag se ye rahmat-e-ruswai

taDpe hain malaek bhi wo qahr tha aaankhon mein

dekha tera shaidai to maut bhi ghabrai

dam sadhe wo shab aaya ek dip jala laya

turbat pe asiron ki bajti rahi shahnai