gila kaisa koi pardes mein apna nahin hota

gila kaisā koī pardes meñ apnā nahīñ hotā

kisī sahrā meñ sar par peḌoñ kā saayā nahīñ hotā

hai apnī ziist kī miTTī kī kuchh tāsīr hī aisī

ki is ke baaġh kā koī bhī phal mīThā nahīñ hotā

barī ho jaatī hai ik bhiiḌ apne sab gunāhoñ se

isī ik baat se ki bhiiḌ kā chehra nahīñ hotā

tumhārī bazm meñ kyā kaam hai ham jaise logoñ kā

jahāñ patthar hī patthar hoñ vahāñ shīsha nahīñ hotā

ḳhasāre ishq ke batlāo par ye bhī to batlāo

vo hai kyā kaam ki jis meñ koī ḳhatra nahīñ hotā

hamāre paañv kī beḌī hamārī soch hotī hai

koī patthar hamārī raah kā roḌā nahīñ hotā

koī kuchh bhī kahe lekin ye bhī apnī jagah sach hai

kisī par shak koī yūñhī kabhī paidā nahīñ hotā

mukammal chāñd par jaane kā sapnā ho gayā kab kā

mohabbat kā hī sapnā jaane kyoñ puurā nahīñ hotā

parinde pūchhte phirte pata kyūñkar ke pinjroñ kā

agar kuchh āsmānoñ meñ inheñ ḳhatra nahīñ hotā

nikaltī hai sadā kaḌvī se kaḌvī baat hī jin se

unhīñ lab kā diyā bosa kabhī kaḌvā nahīñ hotā

hamāre dil ke junction par mohabbat naam hai jis kā

kabhī ġhalatī se bhī us train kā ruknā nahīñ hotā

muāfī maañg kar hairat meñ Daalo mat hameñ 'balvant'

yahāñ apne kiye par koī sharminda nahīñ hotā

isī ḳhātir maiñ dushman kī kabhī gintī nahīñ kartā

mujhe ma.alūm hai ke bhiiḌ kā chehra nahīñ hotā

miyāñ farhād-o-majnūñ se to āshiq aaj kā achchhā

kam-az-kam ishq meñ ab jaan kā ḳhatra nahīñ hotā

gila kaisa koi pardes mein apna nahin hota

kisi sahra mein sar par peDon ka saya nahin hota

hai apni zist ki miTTi ki kuchh tasir hi aisi

ki is ke bagh ka koi bhi phal miTha nahin hota

bari ho jati hai ek bhiD apne sab gunahon se

isi ek baat se ki bhiD ka chehra nahin hota

tumhaari bazm mein kya kaam hai hum jaise logon ka

jahan patthar hi patthar hon wahan shisha nahin hota

KHasare ishq ke batlao par ye bhi to batlao

wo hai kya kaam ki jis mein koi KHatra nahin hota

hamare panw ki beDi hamari soch hoti hai

koi patthar hamari rah ka roDa nahin hota

koi kuchh bhi kahe lekin ye bhi apni jagah sach hai

kisi par shak koi yunhi kabhi paida nahin hota

mukammal chand par jaane ka sapna ho gaya kab ka

mohabbat ka hi sapna jaane kyon pura nahin hota

parinde puchhte phirte pata kyunkar ke pinjron ka

agar kuchh aasmanon mein inhen KHatra nahin hota

nikalti hai sada kaDwi se kaDwi baat hi jin se

unhin lab ka diya bosa kabhi kaDwa nahin hota

hamare dil ke junction par mohabbat nam hai jis ka

kabhi ghalati se bhi us train ka rukna nahin hota

muafi mang kar hairat mein Dalo mat hamein 'balwant'

yahan apne kiye par koi sharminda nahin hota

isi KHatir main dushman ki kabhi ginti nahin karta

mujhe malum hai ke bhiD ka chehra nahin hota

miyan farhad-o-majnun se to aashiq aaj ka achchha

kam-az-kam ishq mein ab jaan ka KHatra nahin hota