گلہ کسی سے دل سوگوار مت کرنا

گلہ کسی سے دل سوگوار مت کرنا

جو بے سکوں ہے اسے بے قرار مت کرنا

خزاں کی ضد ہے کہ یہ کاروبار مت کرنا

کلی سے پھول سے خوشبو سے پیار مت کرنا

جنوں ہزار سہی اپنا دامن کردار

دریدہ کرنا مگر داغدار مت کرنا

نہ میں چراغ نہ میں آسمان کا تارا

سواد شام مرا انتظار مت کرنا

کہیں کہیں پہ خموشی بھی جرم ہوتی ہے

ہر اک جگہ پہ سکوت اختیار مت کرنا

فریب کھائے ہیں اتنا کہ دل یہ کہتا ہے

بہار میں بھی یقین بہار مت کرنا

اسی سے جاتی ہے انساں کی آبرو ذاکرؔ

غلط شعار کبھی اختیار مت کرنا