gila kisi se dil-e-sogwar mat karna

gila kisī se dil-e-sogvār mat karnā

jo be-sukūñ hai use be-qarār mat karnā

ḳhizāñ kī zid hai ki ye kārobār mat karnā

kalī se phuul se ḳhushbū se pyaar mat karnā

junūñ hazār sahī apnā dāman-e-kirdār

darīda karnā magar dāġh-dār mat karnā

na maiñ charāġh na maiñ āsmān kā taarā

savād-e-shām mirā intizār mat karnā

kahīñ kahīñ pe ḳhamoshī bhī jurm hotī hai

har ik jagah pe sukūt iḳhtiyār mat karnā

fareb khaa.e haiñ itnā ki dil ye kahtā hai

bahār meñ bhī yaqīn-e-bahār mat karnā

usī se jaatī hai insāñ kī aabrū 'zākir'

ġhalat shi.ār kabhī iḳhtiyār mat karnā

gila kisi se dil-e-sogwar mat karna

jo be-sukun hai use be-qarar mat karna

KHizan ki zid hai ki ye karobar mat karna

kali se phul se KHushbu se pyar mat karna

junun hazar sahi apna daman-e-kirdar

darida karna magar dagh-dar mat karna

na main charagh na main aasman ka tara

sawad-e-sham mera intizar mat karna

kahin kahin pe KHamoshi bhi jurm hoti hai

har ek jagah pe sukut iKHtiyar mat karna

fareb khae hain itna ki dil ye kahta hai

bahaar mein bhi yaqin-e-bahaar mat karna

usi se jati hai insan ki aabru 'zakir'

ghalat shiar kabhi iKHtiyar mat karna