گلے شکوے بھلانا آ گیا پھر

گلے شکوے بھلانا آ گیا پھر

غموں پہ مسکرانا آ گیا پھر

تو کھیلا ہے ہمیشہ دل سے میرے

ہمیں بھی دل دکھانا آ گیا پھر

مری تصویر لے تو جا رہے ہو

اسے دل سے لگانا آ گیا پھر

میری ہر بات کو پرکھا ہے تم نے

مجھے بھی آزمانا آ گیا پھر

تمہاری یاد سے وابستہ ہے دل

تمہیں دل سے بھلانا آ گیا پھر

ہمیشہ پھیر کے منہ بات کرنا

ہمیں بھی روٹھ جانا آ گیا پھر

کسی کے ایک سے رہتے نہیں دن

کہیں میرا زمانہ آ گیا پھر

خدا نے بخش دی توفیق کاشفؔ

ہمیں بھی سر جھکانا آ گیا پھر