gin ke deta hai bala-noshon ko paimana abhi

gin ke detā hai balā-noshoñ ko paimāna abhī

vāqa'ī bilkul gadhā hai pīr-e-mai-ḳhāna abhī

guftugū karte haiñ bāham jām-o-paimāna abhī

qābil-e-tarmīm hai ā.īn-e-mai-ḳhāna abhī

ho na kyūñ-kar vārdāt-e-qatl rozāna abhī

kū-e-qātil meñ nahīñ chaukī abhī thāna abhī

dekhte to haiñ vo har shai be-niyāzāna abhī

raal girtī hai magar be-iḳhtiyārāna abhī

shaiḳh rahte haiñ sharīk-e-bazm-e-rindāna abhī

muft miltī hai to pī lete haiñ rozāna abhī

kyā kaheñ kis se kaheñ apne numā.indoñ kā haal

jaise Daaka mārtā phirtā hai sultāna abhī

kaise pahuñcheñ us ke dar tak paañv meñ tāqat nahīñ

vo hai ludhiyāna meñ aur hai duur ludhiyāna abhī

us lab-e-jāñ-baḳhsh meñ dekhī nahīñ jumbish hanūz

vaa.e nākāmī muqaffal hai shifā-ḳhāna abhī

baap kā saaya to bachpan hī meñ uTThā thā magar

shaiḳh milte haiñ ba-andāz-yatīmāna abhī

us ke aage kyā haqīqat āstīn o jaib kī

noch Daale dāman-e-mahshar bhī dīvāna abhī

mel to shaiḳh o brahman meñ rahe bāham magar

gaḌbaḌā.e hai fazā-e-firqa-vārāna abhī

ham ne maanā ye ki zāhid hai buzurg-o-mohtaram

baat kartā hai magar kambaḳht bachkāna abhī

kar chuke haiñ naqd ḳhidmat jābirān-e-qaum kī

de chuke haiñ bech ke ghar-bār jurmāna abhī

dirham-o-dīnār ke hamrāh aksar besh-tar

jaan kā bhī de chuke haiñ log nazrāna abhī

gin ke deta hai bala-noshon ko paimana abhi

waqa'i bilkul gadha hai pir-e-mai-KHana abhi

guftugu karte hain baham jam-o-paimana abhi

qabil-e-tarmim hai aain-e-mai-KHana abhi

ho na kyun-kar wardat-e-qatl rozana abhi

ku-e-qatil mein nahin chauki abhi thana abhi

dekhte to hain wo har shai be-niyazana abhi

ral girti hai magar be-iKHtiyarana abhi

shaiKH rahte hain sharik-e-bazm-e-rindana abhi

muft milti hai to pi lete hain rozana abhi

kya kahen kis se kahen apne numaindon ka haal

jaise Daka marta phirta hai sultana abhi

kaise pahunchen us ke dar tak panw mein taqat nahin

wo hai ludhiyana mein aur hai dur ludhiyana abhi

us lab-e-jaan-baKHsh mein dekhi nahin jumbish hanuz

wae nakaami muqaffal hai shifa-KHana abhi

bap ka saya to bachpan hi mein uTTha tha magar

shaiKH milte hain ba-andaz-yatimana abhi

us ke aage kya haqiqat aastin o jaib ki

noch Dale daman-e-mahshar bhi diwana abhi

mel to shaiKH o brahman mein rahe baham magar

gaDbaDae hai faza-e-firqa-warana abhi

hum ne mana ye ki zahid hai buzurg-o-mohtaram

baat karta hai magar kambaKHt bachkana abhi

kar chuke hain naqd KHidmat jabiran-e-qaum ki

de chuke hain bech ke ghar-bar jurmana abhi

dirham-o-dinar ke hamrah aksar besh-tar

jaan ka bhi de chuke hain log nazrana abhi