gir ke qadmon pe sar-e-bazm taDapna dekha

gir ke qadmoñ pe sar-e-bazm taḌapnā dekhā

marne vaale kā mirī jaan tamāshā dekhā

ik jahāñ terā tamāshā.ī hai sab ko hai ḳhabar

ā.īna dekh ke mujh ko ye batā kyā dekhā

khol kar naama mirā us ne paḌhā bhī ki nahīñ

nāma-bar merī taraf se use kaisā dekhā

dil jise kahte haiñ pahlū meñ kabhī vo hogā

ham ne to dil kī jagah dāġh-e-tamannā dekhā

kaun kahtā hai ki shohrat tire 'āshiq kī nahīñ

us ko to kūcha-o-bāzār meñ rusvā dekhā

ā.īna-ḳhāne meñ niklā na koī terā javāb

yahī kahtā thā mohabbat kā taqāzā dekhā

tum to masrūf rahe husn kī ārā.ish meñ

ham ne ā.īne meñ kal ik sitam-ārā dekhā

jal gayā tuur gire hazrat-e-mūsā ġhash meñ

kyā kaleja thā ki jis ne tirā jalva dekhā

ishq kī ye bhī karāmat hai agar tum samjho

tum ne apnā mirī āñkhoñ meñ samānā dekhā

TikTikī bāñdhe hue dekh rahā thā tum ko

tum ne 'shankar' kā bhī mahfil meñ tamāshā dekhā

gir ke qadmon pe sar-e-bazm taDapna dekha

marne wale ka meri jaan tamasha dekha

ek jahan tera tamashai hai sab ko hai KHabar

aaina dekh ke mujh ko ye bata kya dekha

khol kar nama mera us ne paDha bhi ki nahin

nama-bar meri taraf se use kaisa dekha

dil jise kahte hain pahlu mein kabhi wo hoga

hum ne to dil ki jagah dagh-e-tamanna dekha

kaun kahta hai ki shohrat tere 'ashiq ki nahin

us ko to kucha-o-bazar mein ruswa dekha

aaina-KHane mein nikla na koi tera jawab

yahi kahta tha mohabbat ka taqaza dekha

tum to masruf rahe husn ki aaraish mein

hum ne aaine mein kal ek sitam-ara dekha

jal gaya tur gire hazrat-e-musa ghash mein

kya kaleja tha ki jis ne tera jalwa dekha

ishq ki ye bhi karamat hai agar tum samjho

tum ne apna meri aankhon mein samana dekha

TikTiki bandhe hue dekh raha tha tum ko

tum ne 'shankar' ka bhi mahfil mein tamasha dekha