gir raha hun sanbhal raha hun main

gir rahā huuñ sañbhal rahā huuñ maiñ

par lagātār chal rahā huuñ maiñ

kahīñ koī dhuāñ na chingārī

kis salīqe se jal rahā huuñ maiñ

apne hāthoñ meñ aag uThā.e hue

barf kī sil pe chal rahā huuñ maiñ

jis pe āñdhī kā aanā jaanā hai

usī raste pe jal rahā huuñ maiñ

ḳhud se bhī hārnā nahīñ manzūr

ḳhud se aage nikal rahā huuñ maiñ

aur koī nahīñ hai koī nahīñ

apnā ne'mul-badal rahā huuñ maiñ

kabhī us ne mujhe chhuā thā 'kamāl'

aur ab tak pighal rahā huuñ maiñ

gir raha hun sanbhal raha hun main

par lagatar chal raha hun main

kahin koi dhuan na chingari

kis saliqe se jal raha hun main

apne hathon mein aag uThae hue

barf ki sil pe chal raha hun main

jis pe aandhi ka aana jaana hai

usi raste pe jal raha hun main

KHud se bhi haarna nahin manzur

KHud se aage nikal raha hun main

aur koi nahin hai koi nahin

apna ne'mul-badal raha hun main

kabhi us ne mujhe chhua tha 'kamal'

aur ab tak pighal raha hun main