giraft-e-saya-e-diwar se nikal aaya

giraft-e-sāya-e-dīvār se nikal aayā

maiñ ek umr ke āzār se nikal aayā

na jānñā bhī to ik jānñe kī sūrat hai

ajiib ruḳh mire inkār se nikal aayā

maiñ apnī qīmat-e-ehsās ke javāz meñ thā

so ye huā ki maiñ bāzār se nikal aayā

abhī ruke bhī na the ham paḌāv kī ḳhātir

nayā safar na.ī raftār se nikal aayā

samajh rahe the kahīñ dafn ho gayā hogā

vo ḳhauf phir dar-o-dīvār se nikal aayā

maiñ chup huā to use bolnā hī thā ik din

vo zinda harf lab-e-dār se nikal aayā

kisī ḳhayāl se kyā kyā ḳhayāl jaag uThe

ye shaġhl lamha-e-bekār se nikal aayā

giraft-e-saya-e-diwar se nikal aaya

main ek umr ke aazar se nikal aaya

na jaanna bhi to ek jaanne ki surat hai

ajib ruKH mere inkar se nikal aaya

main apni qimat-e-ehsas ke jawaz mein tha

so ye hua ki main bazar se nikal aaya

abhi ruke bhi na the hum paDaw ki KHatir

naya safar nai raftar se nikal aaya

samajh rahe the kahin dafn ho gaya hoga

wo KHauf phir dar-o-diwar se nikal aaya

main chup hua to use bolna hi tha ek din

wo zinda harf lab-e-dar se nikal aaya

kisi KHayal se kya kya KHayal jag uThe

ye shaghl lamha-e-bekar se nikal aaya