gire hain lafz waraq pe lahu lahu ho kar

gire haiñ lafz varaq pe lahū lahū ho kar

mahāz-e-zīst se lauTā huuñ suraḳh-rū ho kar

usī kī diid ko ab raat din taḌapte haiñ

ki jis se baat na kī ham ne dū-badū ho kar

bujhā charāġh hai dil kā vagarna kaise mujhe

nazar na aa.egā vo mere chaar sū ho kar

ham apne aap hī mujrim haiñ apne munsif bhī

ḳhud e'tirāf kareñ apne rū-ba-rū ho kar

us ek ḳhvāhish-e-dil kā patā chalā na use

jo darmiyāñ meñ rahī sirf guftugū ho kar

maiñ sab meñ rahte hue kis tarah bhulā.ūñ tujhe

har ek shaḳhs hī miltā hai mujh ko tū ho kar

ab us ke sāmne jaate hue bhī Dartā huuñ

bhulā diyā thā jise mahv-e-justujū ho kar

huī na jazb zamīñ meñ to raat kī bārish

fazā meñ phail ga.ī ḳhaak rañg-o-bū ho kar

miTā jo aañkh ke shīshoñ se us kā aks 'nasīm'

ragoñ meñ phail gayā ḳhuuñ kī aarzū ho kar

gire hain lafz waraq pe lahu lahu ho kar

mahaz-e-zist se lauTa hun suraKH-ru ho kar

usi ki did ko ab raat din taDapte hain

ki jis se baat na ki hum ne du-badu ho kar

bujha charagh hai dil ka wagarna kaise mujhe

nazar na aaega wo mere chaar su ho kar

hum apne aap hi mujrim hain apne munsif bhi

KHud e'tiraf karen apne ru-ba-ru ho kar

us ek KHwahish-e-dil ka pata chala na use

jo darmiyan mein rahi sirf guftugu ho kar

main sab mein rahte hue kis tarah bhulaun tujhe

har ek shaKHs hi milta hai mujh ko tu ho kar

ab us ke samne jate hue bhi Darta hun

bhula diya tha jise mahw-e-justuju ho kar

hui na jazb zamin mein to raat ki barish

faza mein phail gai KHak rang-o-bu ho kar

miTa jo aankh ke shishon se us ka aks 'nasim'

ragon mein phail gaya KHun ki aarzu ho kar