girne ka bahut Dar hai ai dil na phisal jaana

girne kā bahut Dar hai ai dil na phisal jaanā

is bām-e-mohabbat par mushkil hai sambhal jaanā

dil merī sune kyūñkar samjhā.ūñ use kyā maiñ

vahshat ne sikhāyā hai qaabū se nikal jaanā

vo tere faqīroñ ko āñkhoñ se zarā dekhe

jis ne nahīñ dekhā hai qismat kā badal jaanā

dikhlāo ruḳh-e-zebā tā mujh ko qarār aa.e

āsāñ nahīñ āshiq kā bātoñ meñ bahal jaanā

kamzor kiyā mujh ko ab zo.af-e-naqāhat ne

ai ishq zarā mere pahlū ko badal jaanā

jalnā tumheñ is dil kā maiñ aaj dikhā.ūñgā

tum ne nahīñ dekhā hai ik parche kā jal jaanā

āshiq tirī mahfil se uThtā hai yahī kah kar

yaañ majma-e-dushman hai ab chāhiye Tal jaanā

sar-gashtagī-e-āshiq kyā tum ko batā.ūñ maiñ

taqdīr badalnā hai āñkhoñ kā badal jaanā

nādān tabīboñ ko kyā nabz dikhā.ūñ maiñ

āzār-e-mohabbat ko saudā kā ḳhalal jaanā

vahshat hai fuzūñ dil kī tanhā na chalā jaa.e

lāzim hai 'jamīla' ab sahrā ko nikal jaanā

girne ka bahut Dar hai ai dil na phisal jaana

is baam-e-mohabbat par mushkil hai sambhal jaana

dil meri sune kyunkar samjhaun use kya main

wahshat ne sikhaya hai qabu se nikal jaana

wo tere faqiron ko aankhon se zara dekhe

jis ne nahin dekha hai qismat ka badal jaana

dikhlao ruKH-e-zeba ta mujh ko qarar aae

aasan nahin aashiq ka baaton mein bahal jaana

kamzor kiya mujh ko ab zoaf-e-naqahat ne

ai ishq zara mere pahlu ko badal jaana

jalna tumhein is dil ka main aaj dikhaunga

tum ne nahin dekha hai ek parche ka jal jaana

aashiq teri mahfil se uThta hai yahi kah kar

yan majma-e-dushman hai ab chahiye Tal jaana

sar-gashtagi-e-ashiq kya tum ko bataun main

taqdir badalna hai aankhon ka badal jaana

nadan tabibon ko kya nabz dikhaun main

aazar-e-mohabbat ko sauda ka KHalal jaana

wahshat hai fuzun dil ki tanha na chala jae

lazim hai 'jamila' ab sahra ko nikal jaana