girte ubharte Dubte dhaare se kaT gaya

girte ubharte Dūbte dhāre se kaT gayā

dariyā simaT ke apne kināre se kaT gayā

mausam ke sard-o-garm ishāre se kaT gayā

zaḳhmī vajūd vaqt ke dhāre se kaT gayā

kyā farq us ko jaḌ se ukhāḌā gayā jise

TukḌe kiyā tabar ne ki aare se kaT gayā

tanhā.ī ham-kanār hai sahrā kī rāt-bhar

kaise maiñ apne chāñd sitāre se kaT gayā

chaltā hai apne paañv pe ab ān-bān se

achchhā huā vo jhūTe sahāre se kaT gayā

dīvāreñ ūñchī hotī ga.iiñ ās-pās kī

ghar merā pesh-o-pas ke nazāre se kaT gayā

niklā thā ik qadam hī had-e-ehtiyāt se

sho.aloñ se bachne vaalā sharāre se kaT gayā

aatā nahīñ yaqīñ ki nazar us ne pher lī

kaise vo apne dard ke maare se kaT gayā

girte ubharte Dubte dhaare se kaT gaya

dariya simaT ke apne kinare se kaT gaya

mausam ke sard-o-garm ishaare se kaT gaya

zaKHmi wajud waqt ke dhaare se kaT gaya

kya farq us ko jaD se ukhaDa gaya jise

TukDe kiya tabar ne ki aare se kaT gaya

tanhai ham-kanar hai sahra ki raat-bhar

kaise main apne chand sitare se kaT gaya

chalta hai apne panw pe ab aan-ban se

achchha hua wo jhuTe sahaare se kaT gaya

diwaren unchi hoti gain aas-pas ki

ghar mera pesh-o-pas ke nazare se kaT gaya

nikla tha ek qadam hi had-e-ehtiyat se

shoalon se bachne wala sharare se kaT gaya

aata nahin yaqin ki nazar us ne pher li

kaise wo apne dard ke mare se kaT gaya