girya, mayusi, gham-e-tark-e-wafa kuchh na raha

girya, māyūsī, ġham-e-tark-e-vafā kuchh na rahā

zindagī rah ga.ī jiine kā mazā kuchh na rahā

raushnī thī to har ik shai kī haqīqat thī ayaañ

tīrgī meñ mirī āñkhoñ ke sivā kuchh na rahā

pairahan rañg birañge nikal aa.e itne

nau-damīda gul-e-shabbū meñ chhupā kuchh na rahā

khā ga.ī ḳhaak ko hī ḳhaak kareñ kisī se gila

kyā kuredeñ ki tah-e-ḳhāk chhapā kuchh na rahā

tere milne ke Dhañg bhī taslīm magar

zā.iqa is tarah badlā ki mazā kuchh na rahā

kyuuñ na ho hashr bapā dād-e-vafā kyuuñ na mile

jab tire chāhne vāloñ ke sivā kuchh na rahā

kyuuñ na mehmānoñ ke kamre meñ sajā.eñ in ko

ilm kā naam kitāboñ ke sivā kuchh na rahā

ḳhushbū-e-vasl tavajjoh kā vo aalam vo ḳhulūs

Dūbte chāñd kī āġhosh meñ kyā kuchh na rahā

girya, mayusi, gham-e-tark-e-wafa kuchh na raha

zindagi rah gai jine ka maza kuchh na raha

raushni thi to har ek shai ki haqiqat thi ayan

tirgi mein meri aankhon ke siwa kuchh na raha

pairahan rang birange nikal aae itne

nau-damida gul-e-shabbu mein chhupa kuchh na raha

kha gai KHak ko hi KHak karen kisi se gila

kya kureden ki tah-e-KHak chhapa kuchh na raha

tere milne ke Dhang bhi taslim magar

zaiqa is tarah badla ki maza kuchh na raha

kyun na ho hashr bapa dad-e-wafa kyun na mile

jab tere chahne walon ke siwa kuchh na raha

kyun na mehmanon ke kamre mein sajaen in ko

ilm ka nam kitabon ke siwa kuchh na raha

KHushbu-e-wasl tawajjoh ka wo aalam wo KHulus

Dubte chand ki aaghosh mein kya kuchh na raha