go chahta tha bahut par ye mujhse ho na saka

go chāhtā thā bahut par ye mujh se ho na sakā

maiñ arz-e-dil meñ mohabbat kā biij bo na sakā

bhañvar meñ yuuñ to mirī naav bārhā aa.ī

magar havas kā samundar mujhe Dubo na sakā

sadā-e-gumbad-e-be-dar huuñ qaid huuñ kab se

maiñ apne aap meñ koī sadā samo na sakā

maiñ māh-o-sāl ke resham se narm dhāge meñ

tumhārī yaad ke motī kabhī piro na sakā

bichhaḌte vaqt vo royā lipaT ke mujh se bahut

ajab sitam hai ki maiñ phir bhī khul ke ro na sakā

ajiib shor uThā thā havas ke dariyā meñ

magar maiñ shor meñ āvāz apnī kho na sakā

bahut se yuuñ to mujhe ham-safar mile 'aḳhtar'

magar koī bhī mire ġham kā bojh Dho na sakā

go chahta tha bahut par ye mujh se ho na saka

main arz-e-dil mein mohabbat ka bij bo na saka

bhanwar mein yun to meri naw barha aai

magar hawas ka samundar mujhe Dubo na saka

sada-e-gumbad-e-be-dar hun qaid hun kab se

main apne aap mein koi sada samo na saka

main mah-o-sal ke resham se narm dhage mein

tumhaari yaad ke moti kabhi piro na saka

bichhaDte waqt wo roya lipaT ke mujh se bahut

ajab sitam hai ki main phir bhi khul ke ro na saka

ajib shor uTha tha hawas ke dariya mein

magar main shor mein aawaz apni kho na saka

bahut se yun to mujhe ham-safar mile 'aKHtar'

magar koi bhi mere gham ka bojh Dho na saka