go dahr ke naqshe mein hain bahar bhi nahin hum

go dahr ke naqshe meñ haiñ bāhar bhī nahīñ ham

rakhte haiñ nishāñ aur ujāgar bhī nahīñ ham

kyuuñ ham se phir ummīd-e-sadaf bāñdh rahe ho

jab tum ko patā hai ki samundar bhī nahīñ ham

ḳhushbū kī tarah phuul ke piñjre meñ nahīñ band

āzād fazāoñ kā muqaddar bhī nahīñ ham

ehsās hai phir ḳhāna-badoshī kā hameñ kyuuñ

rahne ko Thikāna bhī hai be-ghar bhī nahīñ ham

kaise ho ḳhad-o-ḳhāl se pahchān hamārī

mā'nī kī tarah lafz ke andar bhī nahīñ ham

parvāz sabab kaise ho bachchoñ kī ḳhushī kā

titlī kī tarah mus.haf-e-gul par bhī nahīñ ham

is kā ye taqāzā hai ki ahkām bajā laa.eñ

jis husn kā sarkār ke naukar bhī nahīñ ham

go dahr ke naqshe mein hain bahar bhi nahin hum

rakhte hain nishan aur ujagar bhi nahin hum

kyun hum se phir ummid-e-sadaf bandh rahe ho

jab tum ko pata hai ki samundar bhi nahin hum

KHushbu ki tarah phul ke pinjre mein nahin band

aazad fazaon ka muqaddar bhi nahin hum

ehsas hai phir KHana-badoshi ka hamein kyun

rahne ko Thikana bhi hai be-ghar bhi nahin hum

kaise ho KHad-o-KHal se pahchan hamari

ma'ni ki tarah lafz ke andar bhi nahin hum

parwaz sabab kaise ho bachchon ki KHushi ka

titli ki tarah mushaf-e-gul par bhi nahin hum

is ka ye taqaza hai ki ahkaam baja laen

jis husn ka sarkar ke naukar bhi nahin hum