go jawani mein thi kaj-rai bahut

go javānī meñ thī kaj-rā.ī bahut

par javānī ham ko yaad aa.ī bahut

zer-e-burqa.a tū ne kyā dikhlā diyā

jam.a haiñ har sū tamāshā.ī bahut

haT pe is kī aur pis jaate haiñ dil

raas hai kuchh us ko ḳhud-rā.ī bahut

sarv yā gul aañkh meñ jachte nahīñ

dil pe hai naqsh us kī rānā.ī bahut

chuur thā zaḳhmoñ meñ aur kahtā thā dil

rāhat is taklīf meñ paa.ī bahut

aa rahī hai chāh-e-yūsuf se sadā

dost yaañ thoḌe haiñ aur bhaa.ī bahut

vasl ke ho ho ke sāmāñ rah ga.e

meñh na barsā aur ghaTā chhā.ī bahut

jāñ-nisārī par vo bol uTThe mirī

haiñ fidā.ī kam tamāshā.ī bahut

ham ne har adnā ko aalā kar diyā

ḳhāksārī apnī kaam aa.ī bahut

kar diyā chup vāqi.āt-e-dahr ne

thī kabhī ham meñ bhī goyā.ī bahut

ghaT ga.iiñ ḳhud talḳhiyāñ ayyām kī

yā ga.ī kuchh baḌh shakebā.ī bahut

ham na kahte the ki 'hālī' chup raho

rāst-goī meñ hai rusvā.ī bahut

go jawani mein thi kaj-rai bahut

par jawani hum ko yaad aai bahut

zer-e-burqa tu ne kya dikhla diya

jama hain har su tamashai bahut

haT pe is ki aur pis jate hain dil

ras hai kuchh us ko KHud-rai bahut

sarw ya gul aankh mein jachte nahin

dil pe hai naqsh us ki ranai bahut

chur tha zaKHmon mein aur kahta tha dil

rahat is taklif mein pai bahut

aa rahi hai chah-e-yusuf se sada

dost yan thoDe hain aur bhai bahut

wasl ke ho ho ke saman rah gae

meinh na barsa aur ghaTa chhai bahut

jaan-nisari par wo bol uTThe meri

hain fidai kam tamashai bahut

hum ne har adna ko aala kar diya

KHaksari apni kaam aai bahut

kar diya chup waqiat-e-dahr ne

thi kabhi hum mein bhi goyai bahut

ghaT gain KHud talKHiyan ayyam ki

ya gai kuchh baDh shakebai bahut

hum na kahte the ki 'haali' chup raho

rast-goi mein hai ruswai bahut