go nazar aksar wo husn-e-la-zawal aa jaega

go nazar aksar vo husn-e-lā-zavāl aa jā.egā

raah meñ lekin sarāb-e-māh-o-sāl aa jā.egā

yā shikan-ālūd ho jā.egī manzar kī jabīñ

yā hamārī aañkh ke shīshe meñ baal aa jā.egā

ret par sūrat-garī kartī hai kyā bād-e-junūb

koī dam meñ mauja-e-bād-e-shimāl aa jā.egā

dosto merī tabī.at kā bharosa kuchh nahīñ

hañste hañste aañkh meñ rañg-e-malāl aa jā.egā

jaane kis din haath se rakh dūñgā duniyā kī zamām

jaane kis din tark-e-duniyā kā ḳhayāl aa jā.egā

hādsa ye hai ki saarī zillatoñ ke bāvajūd

rafta rafta zaḳhm sū-e-indimāl aa jā.egā

go nazar aksar wo husn-e-la-zawal aa jaega

rah mein lekin sarab-e-mah-o-sal aa jaega

ya shikan-alud ho jaegi manzar ki jabin

ya hamari aankh ke shishe mein baal aa jaega

ret par surat-gari karti hai kya baad-e-junub

koi dam mein mauja-e-baad-e-shimal aa jaega

dosto meri tabiat ka bharosa kuchh nahin

hanste hanste aankh mein rang-e-malal aa jaega

jaane kis din hath se rakh dunga duniya ki zamam

jaane kis din tark-e-duniya ka KHayal aa jaega

hadsa ye hai ki sari zillaton ke bawajud

rafta rafta zaKHm su-e-indimal aa jaega