go siyah-baKHt hun par yar lubha leta hai

go siyah-baḳht huuñ par yaar lubhā letā hai

shakl saaya ke mujhe saath lagā letā hai

go mulāqāt nahīñ ālam-e-bedārī meñ

ḳhvāb meñ par vo hameñ saath sulā letā hai

ashk ko Tuk bun-e-mizhgāñ meñ Thaharne de dilā

ye tirā dekh to haañ dekh to kyā letā hai

rāhi-e-mulk-e-adam se na kar itnī kāvish

dam musāfir ye tah-e-naKhl zarā letā hai

shīsha-e-dil meñ mire tere ḳhayāl-e-ḳhat se

aa gayā baal hai to mol use kyā letā hai

ye masal ai but-e-mai-nosh sunī hai ki nahīñ

le hai bartan jo koī us ko bajā letā hai

tū vo hai nām-e-ḳhudā ai but-e-kāfir ki tire

zāhid-e-gosha-nashīñ bhī qadam aa letā hai

dil pe talvār sī kuchh lagtī hai jab ġhair ko tū

paas abrū ke ishāre se bulā letā hai

kyuuñ na phūle dil-e-sad-chāk hamārā yaaro

gul samajh kar vo use sar pe chaḌhā letā hai

mauj-e-dariyā to kab aTkhelī se yuuñ chaltī hai

par tirī kabk-e-darī chaal uḌā letā hai

zulf-e-mushkīñ ko na chheḌ us kī dilā maan kahā

apne kyuuñ sar pe balā ahl-e-ḳhatā letā hai

huuk sī uThtī hai kuchh dil meñ mire aah 'nasīr'

jab vo pahlū meñ raqīboñ ko biThā letā hai

go siyah-baKHt hun par yar lubha leta hai

shakl saya ke mujhe sath laga leta hai

go mulaqat nahin aalam-e-bedari mein

KHwab mein par wo hamein sath sula leta hai

ashk ko Tuk bun-e-mizhgan mein Thaharne de dila

ye tera dekh to han dekh to kya leta hai

rahi-e-mulk-e-adam se na kar itni kawish

dam musafir ye tah-e-naKhl zara leta hai

shisha-e-dil mein mere tere KHayal-e-KHat se

aa gaya baal hai to mol use kya leta hai

ye masal ai but-e-mai-nosh suni hai ki nahin

le hai bartan jo koi us ko baja leta hai

tu wo hai nam-e-KHuda ai but-e-kafir ki tere

zahid-e-gosha-nashin bhi qadam aa leta hai

dil pe talwar si kuchh lagti hai jab ghair ko tu

pas abru ke ishaare se bula leta hai

kyun na phule dil-e-sad-chaak hamara yaro

gul samajh kar wo use sar pe chaDha leta hai

mauj-e-dariya to kab aTkheli se yun chalti hai

par teri kabk-e-dari chaal uDa leta hai

zulf-e-mushkin ko na chheD us ki dila man kaha

apne kyun sar pe bala ahl-e-KHata leta hai

huk si uThti hai kuchh dil mein mere aah 'nasir'

jab wo pahlu mein raqibon ko biTha leta hai