go tahi-daman hun lekin gham nahin

go tahī-dāman huuñ lekin ġham nahīñ

tere dāman kā sahārā kam nahīñ

aaj hī ye baat ai hamdam nahīñ

ek muddat se koī aalam nahīñ

juz tire dil meñ kisī kā ġham nahīñ

tujh se itnā rābta bhī kam nahīñ

jab qadam uTThe to rukte haiñ kahīñ

aaj manzil hī nahīñ yā ham nahīñ

aañkh ham āshufta-hāloñ se milā.e

gardish-e-daurāñ meñ itnā dam nahīñ

donoñ aalam bhī muḳhālif hoñ to kyā

mutma.in huuñ maiñ ki tū barham nahīñ

dil meñ itnī bas chukī hai un kī yaad

vo bhulā bhī deñ to koī ġham nahīñ

ham se pūchho zabt-e-ġham kī lazzateñ

rone vāloñ ko shu.ūr-e-ġham nahīñ

ham se vo tark-e-ta.alluq kar chuke

aur phir un kī mohabbat kam nahīñ

apne apne ġham meñ hai har aadmī

aadmī ko aadmī kā ġham nahīñ

ahrman apnī jagah hai ahrman

fitrat-e-insāñ bhī lekin kam nahīñ

ġham hai is duniyā meñ jān-e-zindagī

zindagī meñ ġham na ho to ham nahīñ

aah anjām-e-ġham-e-dil ai 'shamīm'

ro rahā huuñ aur āñkheñ nam nahīñ

go tahi-daman hun lekin gham nahin

tere daman ka sahaara kam nahin

aaj hi ye baat ai hamdam nahin

ek muddat se koi aalam nahin

juz tere dil mein kisi ka gham nahin

tujh se itna rabta bhi kam nahin

jab qadam uTThe to rukte hain kahin

aaj manzil hi nahin ya hum nahin

aankh hum aashufta-haalon se milae

gardish-e-dauran mein itna dam nahin

donon aalam bhi muKHalif hon to kya

mutmain hun main ki tu barham nahin

dil mein itni bas chuki hai un ki yaad

wo bhula bhi den to koi gham nahin

hum se puchho zabt-e-gham ki lazzaten

rone walon ko shuur-e-gham nahin

hum se wo tark-e-talluq kar chuke

aur phir un ki mohabbat kam nahin

apne apne gham mein hai har aadmi

aadmi ko aadmi ka gham nahin

ahrman apni jagah hai ahrman

fitrat-e-insan bhi lekin kam nahin

gham hai is duniya mein jaan-e-zindagi

zindagi mein gham na ho to hum nahin

aah anjam-e-gham-e-dil ai 'shamim'

ro raha hun aur aankhen nam nahin