گو ترے وصل کا لگتا نہیں امکاں جاناں

گو ترے وصل کا لگتا نہیں امکاں جاناں

ہم تو کر بیٹھے تجھے ملنے کا پیماں جاناں

اس سے پہلے تو نہیں دیکھا کہیں تجھ سا حسیں

تیری مسکان پہ ہو جاؤں میں قرباں جاناں

اب بہار آئے گی رخصت یہ خزاں ہوتی ہے

کیوں سمجھتا نہیں اس کو دل ناداں جاناں

حال دل تجھ کو سنانے میں نہ ہو بے ادبی

کیا کہوں سوچ کے ہوتا ہوں پریشاں جاناں

میری محفل میں کمی ہے تو فقط تیری ہے

تیرے بن دل بھی دھڑکتا ہے تو جاناں جاناں

اس قدر گرتے ہوئے دیکھے ہیں انساں میں نے

خود کو ڈر لگتا ہے کہتے ہوئے انساں جاناں

تو نہیں تھا تو یہ دکھ درد مرے ساتھ رہے

ان غموں کے بھی تو مجھ پر رہے احساں جاناں

گر محبت ہمیں بازار میں مل جاتی کہیں

اس کے سودے میں تو دے دیتے دل و جاں جاناں

جو بھی ثاقبؔ نے لکھی ہے وہ غزل تیرے لیے

اور ہوتا ہی نہیں کوئی بھی عنواں جاناں