go wasia sahra mein ek haqir zarra hun

go vasī.a sahrā meñ ik haqīr zarra huuñ

rah-ravī meñ sarsar huuñ raqs meñ bagūlā huuñ

har samudr-manthan se zahr hī nikaltā hai

maiñ ye zahr jīvan kā hañs ke pī bhī saktā huuñ

ye bharī-purī dhartī ik anant melā hai

aur saare mele meñ jaise maiñ akelā huuñ

yuuñ to phuul phabtā hai har hasīn joḌe par

jis ne chun liyā mujh ko maiñ usī kā belā huuñ

kal har ek jalve meñ laakh jalve paidā the

maiñ ki thā tamāshā.ī aaj ḳhud tamāshā huuñ

zindagī ke rastoñ par zaḳhm-ḳhurda dīvāna

kah rahā thā 'zaidī' se maiñ bhī aap jaisā huuñ

go wasia sahra mein ek haqir zarra hun

rah-rawi mein sarsar hun raqs mein bagula hun

har samudr-manthan se zahr hi nikalta hai

main ye zahr jiwan ka hans ke pi bhi sakta hun

ye bhari-puri dharti ek anant mela hai

aur sare mele mein jaise main akela hun

yun to phul phabta hai har hasin joDe par

jis ne chun liya mujh ko main usi ka bela hun

kal har ek jalwe mein lakh jalwe paida the

main ki tha tamashai aaj KHud tamasha hun

zindagi ke raston par zaKHm-KHurda diwana

kah raha tha 'zaidi' se main bhi aap jaisa hun